Qytetarët sfidojnë temperaturat nën zero dhe reshjet e borës, mbushin sheshet në 14 qytetet ruse, mbi 170 të arrestuar

Policia ruse ka arrestuar 176 persona në protestat kundër operacionit ushtarak të Moskës në Ukrainë, tha një OJQ.

OVD-Info, e cila monitoron arrestimet gjatë protestave, tha se policia kishte arrestuar të paktën 176 persona gjatë demonstratave në 14 qytete në Rusi.

Një gazetar i agjencisë së lajmeve AFP në Moskë ishte dëshmitar i më shumë se 20 personave të arrestuar nga policia e trazirave nën reshjet e mëdha të borës në parkun qendror të kryeqytetit Zaryadye, një distancë e shkurtër nga Kremlini.

Organizatorët thanë në një deklaratë se ata donin të protestonin kundër “kolapsit të ekonomisë (të Rusisë)”, kundër presidentit rus Vladimir Putin dhe të kërkonin lirinë për kritikun e burgosur të Kremlinit, Alexei Navalny.

“Rusia meriton paqen, demokracinë dhe prosperitetin”, thanë ata.

Në qytetin e dytë të Rusisë, Shën Petersburg, AFP pa arrestime të shumta pranë Asamblesë Legjislative të qytetit ku u mblodhën rreth 40 njerëz, megjithëse ishte e paqartë se sa ishin atje për të protestuar.