Rusia kërcënon vendin anëtar të NATO-s, BE i del në mbrojtje

“Vendimi i Lituanisë për të limituar tranzitin e mallrave në rajonin e Kaliningradit është e paligjshme dhe e paprecedentë”, tha zëdhënësi i Kremlinit, Dmitry Peskov gjatë një interviste për agjencinë e lajmeve TASS.

Ministri i Jashtëm i Lituanisë, Gabrielius Landsbergis u përgjigj duke thënë se limitimi i kalimit të mallrave në enklavën ruse vjen si pasojë e hyrjes në fuqi të sanksioneve të vendosura nga BE. Ai shton se nga kjo masë nuk preken të gjitha mallrat, por kryesisht eksporti i çelikut.

Përfaqësuesi i lartë i BE-së, Josep Borrell doli në krah të Vilniusit pas kërcënimit të Rusisë. ”Kalimi tokësor mes Kaliningradit dhe Rusisë nuk është bllokuar. Pasagjerët dhe mallrat që nuk janë pjesë e sanksioneve vijojnë të kalojnë transit. Lituania nuk ka marrë asnjë kufizim unilaterale, por thjesht ka aplikuar sanksionet. Pjesa tjetër është propagandë”.