SHBA paralajmëron Rusinë: NATO do përgjigjet me “forcën e saj të plotë” nëse sulmon territorin e saj

Këshilltari i Sigurisë Kombëtare të SHBA, Jake Sullivan paralajmëroi këtë të diel se nëse Rusia prek territorin e NATO-s, blloku do të përgjigjet me “forcën e tij të plotë”.

Sullivan tha se një veprim i tillë do të fuste automatikisht në fuqi Nenin 5 të NATO-s, i cili thotë se një sulm ndaj një aleati të NATO-s do të konsiderohej sulm ndaj të gjithë aleatëve.

“Nëse do të ketë një sulm ushtarak në territorin e NATO-s, ai do të aktivizojë Nenin 5 dhe ne do të përdornim forcën e plotë të aleancës së NATO-s për t’u përgjigjur”, tha ai për CBS.

“Gjithçka që unë do të them është se nëse Rusia sulmon, qëllon, godet territorin e NATO-s, aleanca e NATO-s do t’i përgjigjet”.

Reagimi vjen vetëm disa orë pasi forcat ruse hodhën të paktën 30 raketa në një bazë që përdorej nga NATO, vetëm 24 kilometra nga kufiri polak, territor i NATO-s.