Vala e re e infektimeve me Covid-19, Greqia drejt rikthimit të maskave

Një valë e re infektimesh me Covid-19 ka mbërthyer Evropën në javët e fundit.

Duke folur në një konferencë urgjente publike në Athinë, shefi i Organizatës Kombëtare të Shëndetit Publik (EODY) Theoklis Zaoutis dhe eksperti i epidemiologjisë Dimitris Paraskevis vunë në dukje se të dhënat tregojnë që numri i rasteve aktive në Greqi aktualisht vlerësohet midis 150,000 dhe 200,000.

Paraskevis vuri në dukje se rritjet më të mëdha të infektimeve janë në ishujt e Jonit dhe jugut të Egjeut dhe në Kretë, por edhe në kryeqytetin grek.

Ekspertët shtuan se shkalla e transmetimit të SARS-CoV-2 është llogaritur në 1.3 – që do të thotë se çdo 10 persona të infektuar do të infektojnë 13 të tjerë.

Sipas tyre, vala aktuale e infektimeve do të arrijë kulmin nga mesi i muajit Korrik.

Në tre javët e fundit kanë ardhur në rritje edhe shtrimet në spitale dhe personat e intubuar, konfirmuan përfaqësuesit e EODY, por shtuan se sistemi shëndetësor publik nuk është nën presion.

Ata gjithashtu vunë në dukje se komiteti i ekspertëve që këshillon qeverinë do të bëjë një rekomandim që maskat të bëhen të detyrueshme në të gjitha mjediset publike të brendshme si supermarkete dhe dyqane.