Borussia Dortmund nuk i ndahet Bayern Munich në garën për titull, teksa ka fituar me rezultatin 5-2 këtë të shtunë ndaj Borussia Mochengladbach, në duelin e javës së 32-të të Bundesliga.
Malen zhbllokoi sfidën në minutën e 5-të, ndërsa në minutën e 18-të Bellingham realizoi nga pika e bardhë e penalltisë. Vetëm dy minuta më pas Haller realizoi golin e tretë, teksa në minutën e 32-të po ai do të gjente rrjetën, i asistuar në të dyja rastet nga Malen.
Në pjesën e dytë miqtë u treguan më kërkues dhe në minutën e 75-të Bensebaini realizoi nga pika e bardhë e penalltisë.
10 minuta më pas Stindl do të realizonte golin e dytë për ekipin e tij, por në fund rezultati u vulos nga Reyna që shënoi golin e pestë për Dortmundin në kohën shtesë. Dortmund mbetet në vend të dytë me 67 pikë, një më pak se Bayern Munich.
