Kreu i PD-së, Sali Berisha ka akuzuar qeverinë për përkeqësimin e situatës ekonomike dhe sociale në vend, gjatë një fjale të mbajtur në foltoren e “Ripërtëritjes” në Dibër. Ai u ndal te emigracioni, rënia e lindshmërisë, varfëria dhe vështirësitë me të cilat, sipas tij, përballen pensionistët për të siguruar ushqimet dhe ilaçet.
“Shqipëria rrallë ndonjëherë në histori është rrokullisur siç është rrokullisur këto 14 vite”, deklaroi Berisha, duke e cilësuar situatën demografike dhe ekonomike si shqetësuese. Gjatë fjalës së tij, kreu i PD-së solli në vëmendje edhe një histori personale nga viti 1986, kur kishte punuar për tre muaj në spitalin e Dibrës. Ai tregoi rastin e një pacienti me hipertension, i cili kishte refuzuar të merrte recetën e ilaçeve, pasi nuk kishte mundësi ekonomike për t’i blerë.
“I bëra recetën gati dhe u ula pranë shtratit të tij që t’i shpjegoja ilaçet. Kushtonin gjithsej 12 qindarka. Ai ishte me hipertension. Ia shpjegova. Burrë fisnik, nuk e mori recetën”, rrëfeu Berisha. Sipas tij, pacienti i kishte shpjeguar se të ardhurat ditore nuk i mjaftonin për të siguruar as ushqimin për vete dhe bashkëshorten.
“Doktor, më tha, faleminderit shumë, por nuk e marr. Pse, i thashë unë, 12 qindarka janë. Unë 15 qindarka marr ditën e punës dhe me to duhet të blej bukën bashkë me shoqen time, gruan që kam në shtëpi. Ndaj dhe nuk e marr”, tregoi Berisha. Ai argumentoi se vështirësi të ngjashme, sipas tij, përjetojnë edhe sot shumë qytetarë, veçanërisht pensionistët dhe familjet që përfitojnë ndihmë ekonomike.
“Sot mbi 460 mijë pensionistë marrin pensione të pjesshme”, deklaroi Berisha, duke ngritur pikëpyetje mbi mundësinë që këto të ardhura të mbulojnë nevojat bazë. “Çfarë mund të bëjë ai me 3 mijë lekë ndihmë ekonomike? Ai mund të blejë një javë, maksimumi dy ushqim. Asnjë ilaç”, u shpreh kreu i PD-së. Berisha kritikoi gjithashtu skemën e rimbursimit të barnave, duke pretenduar se heqja e disa medikamenteve nga kjo skemë e vështirëson edhe më shumë trajtimin mjekësor për pensionistët.
Për të ilustruar pretendimin e tij, Berisha tregoi rastin e një miku, i cili, sipas tij, kishte shkuar në farmaci për të blerë një ilaç që ndihmon në hollimin e gjakut, por ishte informuar se medikamenti nuk rimbursohej më. “Bëra hesapin, ai ilaç po ta merrja më kushtonte tre muaj pensionin. Ai ka pension të lartë, por një pension i zakonshëm, shtatë muaj pension”, deklaroi Berisha. Në përfundim, kreu i Partisë Demokratike e përshkroi situatën sociale në vend me tone të forta kritike, duke theksuar vështirësitë e qytetarëve për të përballuar shpenzimet shëndetësore dhe jetesën e përditshme.