Ish-trajneri i njohur italian, Fabio Capello, analizoi me tone të forta paraqitjen e Inter pas humbjes ndaj Bodo/Glimt, rezultat që i dha fund aventurës së zikaltërve në UEFA Champions League.
Skuadra milaneze, finaliste sezonin e kaluar, u eliminua para fazës së 1/8-ave, duke u mposhtur edhe në ndeshjen e kthimit të zhvilluar në San Siro. Sipas Capellos, Interi u shfaq pa ritëm dhe pa ide në fazën sulmuese.
“Ishte një Inter shumë i ngadaltë në çdo aksion, pa shpejtësi dhe pa aftësi për të krijuar epërsi në duele individuale. Nuk pashë asnjë situatë një kundër një, as driblime dhe shumë pak ndryshime krahu”, theksoi ai në analizën e tij.
Capello u ndal edhe te qasja taktike e ekipit të drejtuar nga Cristian Chivu, duke vënë në dukje se sulmet nga krahu i djathtë në pjesën e parë nuk prodhuan rrezik real.
Sipas tij, një nga armët që mund të kishte ndryshuar ndeshjen ishte shfrytëzimi më i madh i Federico Dimarco në krah, por mbrojtësi nuk u kërkua pothuajse fare me ndryshime loje. “Interit i mungoi shpejtësia për të çarë një skuadër të organizuar si Bodo”, shtoi ai.