Chelsea ka nisur zyrtarisht procesin e largimit të lojtarëve që nuk bëjnë pjesë në planet e trajnerit Enzo Maresca për sezonin e ri. Klubi londinez po punon intensivisht për të reduktuar kontingjentin dhe për të siguruar të ardhura nga lojtarët që nuk kanë bindur.
I pari që do të largohet nga “Stamford Bridge” është Renato Veiga. Mesfushori, i cili mbërriti në Londër vetëm një vit më parë dhe ka kontratë deri në 2031, pritet të transferohet në Spanjë, te Villarreal, në një marrëveshje që vlerësohet rreth 30 milionë euro.
Një tjetër emër i rëndësishëm në listën e largimeve është Raheem Sterling. Sulmuesi anglez nuk arriti të përshtatej kurrë plotësisht me ambientin te Chelsea dhe po negocion kalimin te Fulham. Megjithëse ende nuk është arritur një akord përfundimtar, 29-vjeçari nuk po stërvitet me skuadrën dhe duket se lamtumira është e pashmangshme, pavarësisht kontratës së tij që skadon pas dy vitesh.
Ndërkohë, edhe Christopher Nkunku është pranë largimit. Sulmuesi francez pritet të rikthehet në Leipzig, klub që ka shfaqur gatishmërinë të paguajë rreth 45 milionë euro për ta blerë përfundimisht kartonin e tij. Chelsea ka refuzuar një ofertë të fundit nga Bayern Munich, i cili e donte lojtarin vetëm në huazim.