Dinamo City është gati të shkruajë një tjetër faqe të artë në historinë e saj europiane. Pas një rrugëtimi mbresëlënës në Kupat e Europës, skuadra e drejtuar nga trajneri Ilir Daja do të zbresë sot në fushë për ndeshjen e parë të fazës “play-off” të UEFA Conference League.
Pengesa e radhës për blutë është skuadra polake Jagiellonia Białystok, një ekip me përvojë të konsiderueshme në arenën europiane dhe me një formacion të fortë e të disiplinuar. Megjithatë, për Dinamon kjo sfidë nuk shihet si e pakalueshme, sidomos duke pasur parasysh performancën e shkëlqyer që treguan përballë gjigantëve kroatë të Hajduk Split, ku në stadiumin “Air Albania” zhvilluan një ndeshje spektakolare, fituan 3-1 dhe siguruan me meritë kalimin në këtë fazë historike.
Pritshmëritë janë të larta, teksa ndeshja e parë mes Jagiellonia dhe Dinamo City do të zhvillohet sonte në orën 20:15, në stadiumin “Stadion Miejski ë Białymstoku” në Poloni. Dinamo synon një rezultat pozitiv që do t’i jepte më shumë siguri për ndeshjen e kthimit në Tiranë, ku atmosfera pritet të jetë elektrizuese.
