Spektakël, emocione në “Artemio Franchi”. Në ndeshjen e javës së tetë të Serie A, Fiorentina dhe Bologna ndahen në barazim 2-2, në një sfidë të mbushur me episode të diskutueshme dhe ndërhyrje vendimtare të VAR-it.
Bologna e nisi më mirë takimin dhe arriti të kalojë në avantazh në minutën e 26-të me një gol të mrekullueshëm të Castros, i cili goditi fluturimthi me të djathtën, duke mposhtur portierin e Fiorentinës. Në pjesën e dytë, në minutën e 52-të, Cambiaghi dyfishoi rezultatin me një prekje të saktë brenda zonës, duke e futur ndeshjen në binarët e duhur për miqtë.
Por Fiorentina nuk u dorëzua. Në minutën e 73-të, pas ndërhyrjes së VAR-it për një prekje me dorë të Ferguson në zonë, arbitri akordoi penallti që u shndërrua në gol nga Gudmundsson.
Skuadra e Piolit shtoi presionin deri në sekondat e fundit dhe në minutën e 94-t, një tjetër prekje me dorë,këtë herë nga Bernardeschi, solli penalltinë e dytë për vendasit. Moise Kean mori përgjegjësinë dhe barazoi shifrat 2-2, duke shpëtuar ekipin e tij nga humbja.