Kryebashkiaku i Tiranës, Erion Veliaj ka treguar mbi organizimin e spektaklit në ndërrimin e viteve.
Veliaj tha se spektakli do të nisë në orën 22:00, me dy këngëtarët e njohur Elvana Gjata e Alban Skënderaj, për të vijuar pastaj në orën 00:00, me atë që vetë kryebashkiaku e quan “super-spektakël” fishekzjarrësh.
“Vendimmarrja për orën policore merret nga institucionet e mjekësisë. I kemi ndarë sipas profesionalizmit. Për sa kohë ata, duke parë shifrat në Tiranë dhe nivelin e vaksinimit, por edhe fakti që festa bëhet në një ambient të hapur kanë bërë një përjashtim të orës policore. E kemi shfrytëzuar këtë mundësi, me Elvana Gjatën e Alban Skënderajn, e pastaj me fishekzjarrët, pasi për ne shqiptarët ka qenë një periudhë e vështirë, që me 2019 me tërmetin, pastaj me pandeminë.
Kemi përgatitur një super-spektakël fishekzjarrësh për fëmijët, ndoshta më të bukurin në Tiranë. Duke qenë se këto vite ishin në karantinë, nuk ka arsye pse fëmijëria e tyre të shoqërohet nga këto drama, ndaj dhe duam që të jetë një lloj terapie kolektive në shesh. Sheshi është i madh.
Do të fillojë me dy këngëtarët fantastik, spektakli fillon që në orën 22:00. Në 00:00 do të bëjmë një numërim mbrapsht. Ne duam ta përdorim këtë si një mundësi fantastike, edhe për të ndryshuar pak imazhin e vendit, që ka vuajtur shumë. Ka ende njerëz në botë që kujtojnë skemat e viteve 1990 dhe që ne duam t’iu themi se nuk jemi më në atë nivel. Është mundësia ta tregojmë këtë vit, për të ndryshuar imazhin.
Spektakli do të nisë në 22:00 me këngë, ndërsa në 00:00 do të kemi një super-spektakël fishekzjarrësh. I ftoj të gjithë të dalin, sepse do të jetë diçka vërtet mbresëlënëse. Pastaj do të vazhdojmë me këngëtarë e DJ të tjerë. Do ta shfrytëzojmë maksimalisht amnistinë e orës policore”, tha Veliaj.
I pyetur se ku do ta festojë ai Vitin e Ri, kryebashkiaku Veliaj u shpreh se “Unë do të jem në shesh. Nesër në spital, ku bashkia jep shportën e bebeve të lindura. Është thuajse e detyruar që unë të jem në Tiranë, deri në 00:00 me familjen, pastaj me spektaklin e fishekzjarrëve”.
