Granit Xhaka ka rilindur këtë sezon tek Arsenali duke qenë protagonist absolut në sukseset e skuadrës së Artetës. Ai ka dhënë së fundmi një intervistë të gjatë për faqen zyrtare të Arsenalit. Futbollisti me origjinë shqiptare ka rrëfyer se gjithçka në karrierën e tij ka ardhur si frymëzim nga prindërit e tij dhe jeta e tyre.
“Frymëzimi im kryesor kur fillova karrierën time ishte babai im. Ai luajti futboll vetë para se të lëndohej, por nuk ishte vetëm ajo që më frymëzoi mua, ishte jeta e tij në tërësi. Ai më mësoi të mos heq dorë kurrë nga asgjë, të jem i fortë, i ashpër mendërisht.
Por në të vërtetë ai më frymëzoi më shumë si model, sesa në fushë. Kaloi shumë, shumë momente të vështira në jetën e tij. Ai ka qenë gjithmonë shumë i fortë mendërisht dhe më ka mësuar të njëjtat vlera që kam tani në futboll, por edhe në jetën time.
Ai di gjithçka për presionin e të luajturit futboll dhe atë që kalojmë. Megjithatë nuk është vetëm ai, është edhe mamaja ime. Ajo është një prani shumë, shumë e rëndësishme në jetën time. Unë mund t’i flas mamasë sime në një mënyrë të ndryshme nga ç‘bëj me babin tim.
Kështu që për mua që të dy janë frymëzues, sepse atë që ata kaluan kur ishin të rinj, ne thjesht nuk e shohim tani. Nuk besoj se brezi i ri sot mund ta bëjë. Kur prindërit e mi u larguan nga Kosova para luftës, ata nuk ishin të përgatitur për këtë, por e bënë.
Nëse ne, kjo gjeneratë, do të duhej të largoheshim nga shtëpitë tona tani, nuk do të ishim të përgatitur. Nuk e dimë gjuhën apo ku mund të shkonim. Ju nuk dini kujt t’i besoni.
Ia nis me zero para, me borxhe, kështu që është e vështirë të kuptosh dhe është shumë frymëzuese për mua të vish nga vendi ku kanë ardhur prindërit e mi, sepse nuk mendoj se ne, ky brez i ri, mund ta përballojmë këtë. Është një jetë krejtësisht ndryshe që kemi tani”, deklaroi Granit Xhaka.
