Kosova merr përkrahje nga SHBA për fuqizimin e sundimit të ligjit

Ministrja e Drejtësisë e Republikës së Kosovës, Dhurata Hoxha, gjatë vizitës zyrtare dy ditore në Shtetet e Bashkuara të Amerikës mori mbështetje nga Departamenti i Shtetit për fuqizimin e sundimit të ligjit dhe sistemin e drejtësisë.

Në takimin e ministres Hoxha me ndihmës sekretarin e Shtetit për çështje evropiane dhe euroaziatike, përgjegjës për marrëdhëniet e SHBA-së me vendet e Evropës Qendrore dhe Juglindore, Hoyt Brian Yee, u diskutua për sistemin e drejtësisë në Republikën e Kosovës, sfidat dhe arritjet.

Ministrja Hoxha e njohu ndihmës sekretarin për prioritetet e Ministrisë së Drejtësisë, siç janë rishikimi funksional i sektorit të sundimit të ligjit dhe reformat legjislative, si dhe reformën në drejtësi.

Ndihmëssekretari i Shtetit Yee, vlerësoi angazhimin dhe përkushtimin e ministres Hoxha për sundimin e ligjit dhe fuqizimin e legjislacionit që i kontribuon sundimit të ligjit, duke ofruar përkrahje reformës në drejtësi.

Ministrja Hoxha mori mbështetje të plotë të ndihmës sekretarit të Shtetit Yee për reformën legjislative, që fuqizon sundimin e ligjit, llogaridhënien dhe transparencën në drejtësi.