Takimi mes Albin Kurtit dhe Lumir Abdixhikut për profilin e presidentit të ardhshëm është një hap i nevojshëm. Por Kosova nuk ka nevojë për një president të zgjedhur thjesht për të mbyllur një krizë politike.
Ka nevojë për një figurë që ta ngrejë institucionin e Presidentit mbi partitë.
Nëse kriteret janë vërtet integriteti, kultura, personaliteti, përvoja dhe baraslargësia nga partitë, atëherë pyetja është e pashmangshme: Pse jo Veton Surroi?
Surroi është një nga figurat më të njohura të jetës publike të Kosovës. Ka qenë gazetar, publicist, politikan, pjesë e proceseve vendimtare të shtetformimit dhe një zë i pranishëm për dekada në debatin politik e diplomatik.
Mund të mos jetë i pëlqyeshëm për të gjithë. Por Presidenti i Republikës nuk duhet të jetë i pëlqyeshëm për partitë. Duhet të jetë i respektueshëm për shtetin. Kosova nuk ka nevojë për një president që të presë sinjalin nga zyra e kryeministrit, nga selia e LVV-së, LDK-së apo PDK-së. Ka nevojë për një president që, kur duhet, t’u thotë “jo” edhe atyre që e kanë votuar.
Dhe pikërisht këtu fillon testi i vërtetë për partitë. Të gjithë duan të flasin për president “konsensual”, “me integritet”, “mbi palët”. Por a janë vërtet të gatshëm të zgjedhin një figurë që nuk kontrollohet prej tyre? Apo duan një president të baraslarguar vetëm në deklarata dhe të varur në praktikë? Një figurë e fortë, me mendim të vetin dhe me autoritet publik, mund të jetë e parehatshme për partitë.
Por kjo është pikërisht arsyeja pse një figurë e tillë i duhet Kosovës. Presidenti nuk duhet të jetë dekor i shumicës. Nuk duhet të jetë shpërblim për një marrëveshje politike. Nuk duhet të jetë personi më i bindur në tavolinë.
Duhet të jetë figura më e denjë për Republikën. Në këtë kuptim, Veton Surroi është një emër që nuk duhet anashkaluar.
Jo sepse është i vetmi.
Por sepse përfaqëson pikërisht atë lloj profili që partitë thonë se po kërkojnë: një personalitet me histori publike, kulturë politike, njohje ndërkombëtare dhe pavarësi në qëndrime. Nëse Kurti dhe Abdixhiku janë seriozë për një president mbi partitë, atëherë duhet të kenë kurajën të vendosin në tavolinë emra që nuk u përulen partive.
Sepse Kosova nuk ka nevojë për një president të dobët që të mos shqetësojë askënd. Ka nevojë për një President Republike që t’i japë peshë shtetit, jo rehati partive.
Dhe Veton Surroi do ishte më i miri i të mirëve! Një personalitet që do ta përfaqësonte Kosovën kudo në botë, një njeri i letrave dhe i kulturës, një intelektual që e respekton krejt bota shqiptare.
Redaksia e KOHA JONE