Vuçiç po e kalon përgjegjësinë për Kosovën te opozita

Drejtori i Forumit për Marrëdhënie Etnike në Serbi, Dushan Janjiç ka thënë se deklarata e presidentit të Serbisë, Aleksandar Vuçiç se “politika e tij ka pësuar disfatë” ndoshta është përgatitje për kalimin e përgjegjësisë së dështimit tek opozita, kryeministrja, Ana Bërnabiç ose te një palë e tretë.

Janiç i tha agjencisë Beta se ajo deklaratë është një “vlerësim shumë i fuqishëm” që nuk nënkupton dalje nga procesi i dialogut, por që politika e orientuar në mundësitë e brendshme ka pësuar dështim.

“Nuk ka pasur asnjë politikë zyrtare, opinion nuk është njoftuar se çfarë përfaqëson kjo politikë, bisedimet me Prishtinën kanë stagnuar dhe një pjesë e politikës që është udhëhequr përmes serbëve dhe Kishës Ortodokse ka pësuar dështim”, ka thënë Janjiç. Presidenti i Serbisë, Aleksandar Vuçiç ka thënë të hënën se Serbia qe pesë vjet është munduar ta kthejë çështjen e Kosovës në tryezë të bisedimeve, por që tash për tash kjo politikë ka pësuar disfatë. “Politika ime që Serbia të ruajë shumë gjëra në Kosovë, qartazi në Serbi nuk ka fituar, sepse serbët duan të humbin gjithçka, më së shumti dëshirojnë të vajtojnë mbi fatin e tyre. Më shumë duan të qajnë për diçka që është e largët, sesa të kenë diçka në duart e tyre” ka thënë Vuçiç.