Presidenti rus, Vladimir Putin nuk dhënë ende një reagim zyrtar në lidhje me vdekjen e Yevgeni Prigozhinit, i cili deri dy muaj më parë ishte një ndër njerëzit e tij më të afërt dhe udhëhoqi luftën në Ukrainë. Putin deri tani ka qëndruar gojë kyçuar në lidhje me vdekjen e raportuar të Yevgeny Prigozhin.
Perëndimi beson se Yevgeny Prigozhin është vrarë me urdhër të presidentit të Rusisë, Vladimir Putin. Analistët theksojnë se asgjë nuk ndodh në Rusi pa marrë miratimin e Putinit dhe se ministri i mbrojtjes, Sergei Shoigu, apo shefi i ushtrisë, Valeri Gerasimov, nuk mund të merrnin hak ndaj Wagnerit pa një urdhër nga presidenti rus.
Të njëjtën gjë e beson edhe presidenti amerikan, Joe Biden. “Nuk e di çfarë ka ndodhur, por nuk jam i surprizuar. Nuk ndodh asgjë në Rusi ku Putini nuk qëndron pas”, ishte komenti i shkurtër i Biden. Franca ka dyshime lidhur me atë çfarë ka ndodhur realisht me avionin e rrëzuar të shefit të Wagnerit.
“Vdekja e Prigozhin lë pas një kaos të tmerrshëm në pjesën më të madhe të botës për shkak të politikave që ka zhvilluar bashkë me Putinin”, theksoi zëdhënësi i qeverisë franceze, Olivier Veran. Zyrtarët në Ukrainë reaguan duke e konsideruar vrasjen e Prigozhin, një sinjal nga Putini për politikën në Rusi përpara zgjedhjeve të 2024-ës.
Faqja Gbnews.com ka llogaritur se vetëm që nga fillimi i operacionit special ushtarak në Ukrainë në shkurt të vitit të kaluar, ka pasur 39 vdekje misterioze të personazheve që kishin të bënin me presidentin rus. Rasti i fundit që përfundoi në gazeta daton tre muaj më parë, kur oligarku Sergej Grishin vdiq nga septicemia në Moskë, i njohur për shitjen e vilës së tij në Kaliforni te Princ Harry dhe gruaja e tij Meghan.
Jo një personazh shumë i famshëm, por gjithsesi një ish-bankier, i cili kishte kritikuar ashpër punën e zotit të Kremlinit, si sipërmarrës të tjerë të përfshirë në zinxhirë të çuditshëm vrasjesh-vetëvrasjesh, së bashku me të gjithë familjen: Vasily Melnikov, Vladislav Avayev dhe Sergei Protosenya. Shumë më i njohur dhe i lidhur pothuajse në mënyrë të padiskutueshme me aparatet shtetërore, është rasti i Aleksey Navalny, kundërshtari kryesor politik i Putinit, i cili kishte pësuar një tentativë të bujshme helmimi në Siberi përpara se të shkonte në burg. Ndërsa ai ishte në një takim politik, njerëzit që i përkisnin shërbimit sekret të ushtrisë, GRU, kontaminuan të brendshmet e tij me Novichok.
Dy “turistët” misteriozë rusë iu përgjigjën edhe GRU-së, e cila në vitin 2018 në Salisbury të Britanisë së Madhe, shpërndau të njëjtën substancë nervore në dorezën e derës së një ish-agjenti rus, i cili kishte kaluar vite më parë te britanikët dhe se po jepte informacione të tjera të rëndësishme. Gjithashtu në atë rast, objektivi, Sergej Skripal arriti t’i mbijetonte helmimit së bashku me vajzën e tij Yulia, e cila gjithashtu kishte prekur derën.
Rasti tjetër i bujshëm në të cilin personazhet e lidhur me shërbimet sekrete ruse kanë përdorur materiale toksike (në këtë rast radioaktiv) është ai i Aleksandr Litvinenkos, një nga atentatet e para të shkëlqyera, që ndodhi në Londër në vitin 2006. Edhe ai ishte një ish-agjent i kaluar “armikut”, i cili vazhdoi të “bezdiste” Putinin. Dy ish kolegë të tij i shërbyen një filxhan çaj polonium në një hotel në Mayfair. Burri vdiq në spital pas një agonie të tmerrshme. Shumë më shpesh, vrasësit me qira (në Rusi nuk është zbuluar kurrë se cilët ishin nxitësit) kanë preferuar të përdorin metoda më të drejtpërdrejta, megjithëse më pak të sofistikuara.
Në të njëjtën vjeshtë të vitit 2006, gazetarja Anna Politkovskaya u qëllua për vdekje teksa priste ashensorin e shtëpisë së saj. Në fakt dikush më parë kishte tentuar ta helmonte në avion por nuk shkoi mirë. Përsëri me armë zjarri u vranë disa eksponentë të organizatave të të drejtave të njeriut, si Natalia Estemirova, e rrëmbyer dhe e vrarë në vitin 2009, avokati Stanislav Markelov dhe gazetarja Anastasia Baburova, të qëlluar së bashku në të njëjtin vit. Po ashtu edhe Boris Nemtsov, një figurë kryesore e opozitës që ishte gjithashtu zëvendëskryeministër nën Yelsin, i cili u qëllua pranë Kremlinit në 2015.
Raste të panumërta aksidentesh, të gjitha mjaft të çuditshme. Si ai i Mikhail Lesin, i cili kishte qenë ministër i informacionit me Putinin dhe që në vitin 2015 u gjet i vdekur në një dhomë hoteli në Washington. Autopsia konstatoi se ai kishte pirë sasi të mëdha alkooli dhe kishte goditur me dhunë kokën. Ai dyshonte gjithashtu për vdekjen e ish-oligarkut, i cili kishte qenë shumë i afërt me Putinin përpara se të ndahej, Boris Berezovsky.
Në vitin 2013, trupi i tij u gjet në banjën e vilës së tij në Surrey. Rënia ishte fatale për disa kritikë të Kremlinit. Më të njohurit, ndoshta, janë ish-kryetari i kompanisë së naftës Lukoil, Ravil Maganov dhe miliarderi Pavel Antonov, të cilët të dy vdiqën vitin e kaluar pasi kritikuan Operacionin Special Ushtarak. Maganov ra nga dritarja e një spitali në Moskë, ndërsa Antonov fluturoi nga dritarja e një hoteli ndërsa ishte në Indi për të festuar ditëlindjen e tij.
