Klodiana Spahiu propozohet ministre e Shëndetësisë, ja profili i kardiologes

Klodiana Spahiu do të jetë ministrja e re e Shëndetësisë, pas ndryshimeve të fundit në drejtimin e këtij dikasteri.

Spahiu merr këtë detyrë pas dorëheqjes së Evis Salës nga posti i ministres së Shëndetësisë, e bërë publike një ditë më parë. Para emërimit në qeveri, Spahiu mbante detyrën e nënkryetares së Kuvendit.

Vendimi për emërimin e saj pritet të kalojë për shqyrtim në Kuvend ditën e martë, në orën 17:00, ku do të formalizohet edhe ndryshimi në drejtimin e Ministrisë së Shëndetësisë.

Spahiu është mjeke kardiologe me një eksperiencë të gjatë në sistemin shëndetësor, akademi dhe drejtim institucionesh.

Ajo ka përfunduar studimet në Fakultetin e Mjekësisë të Universitetit të Tiranës, në degën Mjekësi e Përgjithshme, në vitin 1997. Më pas, gjatë periudhës 1998-2002, është specializuar në kardiologji pranë QSUT-së “Nënë Tereza”.

Karriera e saj profesionale përfshin edhe një sërë specializimesh jashtë vendit. Spahiu është trajnuar në fushën e kardiologjisë joinvazive, përfshirë ekokardiografinë, PU-EKG dhe eko-dopplerin e karotideve, pranë Universitetit Katolik “Sacro Cuore” në Romë.

Në vitet 2003-2004 ka ndjekur studime pasuniversitare pranë Fakultetit të Mjekësisë, ndërsa në vitin 2005 është specializuar në kardiologjinë invazive, kateterizimin dhe koronarografinë e zemrës në spitalin “Santa Chiara” në Pisa të Italisë.

Formimi i saj është plotësuar edhe me një master profesional në menaxhimin shëndetësor, të cilin e ka përfunduar gjatë viteve 2012-2014.

Në aspektin profesional, Spahiu ka ushtruar detyrën e mjekes në Klinikën e Parë të Kardiologjisë në QSUT. Ajo ka punuar gjithashtu si kardiologe dhe mjeke në repartin e patologjisë në Spitalin e Durrësit, gjatë viteve 2003-2009, përpara se të merrte drejtimin e këtij institucioni.

Paralelisht me angazhimin klinik, ajo ka ndërtuar edhe një karrierë në fushën akademike. Ka qenë pedagoge në Departamentin e Lëndëve Paraklinike në Universitetin e Tiranës, si dhe pedagoge e jashtme e fiziologjisë në Universitetin “UFO” në Tiranë.

Që prej vitit 2008, Spahiu është angazhuar edhe si docente në praktikat e kardiologjisë pranë Universitetit “Zonja e Këshillit të Mirë”.

Klodiana Spahiu mban titullin “Doktore e Shkencave Mjekësore” dhe, nëse propozimi miratohet, do të marrë drejtimin e dikasterit të Shëndetësisë dhe Mirëqenies Sociale.