”Qeveria po i çon shqiptarët drejt përplasjes”, Tabaku: Rama del si lugat që në të gdhirë, duhet zgjidhje politike

Deputetja e Partisë Demokratike, Jorida Tabaku, ka kërkuar largimin e kryeministrit Edi Rama, duke e cilësuar si të domosdoshëm për rikthimin e paqes sociale në vend. Në një reagim në rrjetet sociale, Tabaku akuzoi qeverinë për përkeqësimin e situatës ekonomike dhe vështirësitë me të cilat përballen bizneset vendase. “Shqipëria ka nevojë për një paqe sociale të re, ka nevojë për një zgjidhje politike, ka nevojë për largimin e Edi Ramës”, u shpreh ajo. Duke kritikuar politikat fiskale të qeverisë, deputetja demokrate pretendoi se ato kanë rënduar bizneset e vogla dhe kanë nxitur mbylljen e tyre. “Bizneset janë me qytetarët. Bizneset nuk duhen prekur. Bizneset duhen mbrojtur si shtylla kryesore e ekonomisë së Shqipërisë”, theksoi Tabaku.

Postimi i plotë

U bë dita e tretë që kryeministri, si lugat, del që në të gdhirë e më pas zhduket dhe flet për djegien e biznesit. Ata që e kanë djegur biznesin dhe kanë shkretuar Shqipërinë janë atje sot, duke e mbajtur pushtetin me zor. Shqipëria ka nevojë për një paqe sociale të re, ka nevojë për një zgjidhje politike, ka nevojë për largimin e Edi Ramës. Këto janë kërkesat e studentëve, këto janë kërkesat e biznesit.

Ata që sot qajnë me lot krokodili, sikur u dhimbset biznesi, e kanë shkretuar biznesin vendas. Kanë sjellë 18 ligje me porosi, kanë vendosur TVSH-në për këto biznese të vogla, i kanë mbyllur ato masivisht dhe i kanë detyruar të emigrojnë. Sot, studentët janë duke protestuar për disa kërkesa të drejta. Janë duke protestuar për largimin e kryeministrit, kundër dhunës, kundër korrupsionit, kundër krimit të organizuar, kundër largimit. Dhe kjo kërkon marrjen e një vendimi politik për largimin e Edi Ramës.

Sot, bizneset, të rinjtë, qytetarët, po edhe policët, janë lënë në mëshirë të fatit. Sepse sot nuk ka as ministër të Brendshëm, as Polici të Shtetit, as ministra që janë në detyrë. Nuk ka as kryeministër. Ata kanë nxitur pikërisht këtë konflikt social për t’i vendosur bizneset përballë qytetarëve dhe policinë, nga ana tjetër, përballë qytetarëve, duke i vendosur njerëzit kundër njëri-tjetrit.

Kjo kërkon largimin e Edi Ramës, për plotësimin e kërkesës së parë të studentëve dhe të qytetarëve. Bizneset janë me qytetarët. Bizneset nuk duhen prekur. Bizneset duhen mbrojtur si shtylla kryesore e ekonomisë së Shqipërisë, që është duke vuajtur sot. Por nesër do të jetë më mirë vetëm me largimin e kësaj qeverie.