Koreja e Jugut ka shprehur shqetësimin e saj për një bashkëpunim të mundshëm ushtarak midis Phenianit dhe Moskës pas takimit të Kim Jong Un dhe Vladimir Putin në një qendër hapësinore në Rusi.
Ministri koreano-jugor Kim Yung-ho deklaroi të enjten se dy vendet janë duke ndjekur një “lloj marrëveshjeje ushtarake”, duke vënë në dukje vizitat e fundit të Kim Jong Un në fabrikat e municioneve në Korenë e Veriut dhe vizitën e tij në Rusi së bashku me zyrtarë të lartë ushtarakë.
Ministri iu referua gjithashtu vizitës së fundit të ministrit rus të Mbrojtjes Sergei Shoigu në Phenian dhe deklarimit të Moskës se do të mbështeste zhvillimin e satelitit të Phenianit.
Komentet vijnë pasi zyrtarët amerikanë paralajmëruan se Putini mund të përdorë takimin me liderin e Koresë së Veriut për të kërkuar armë pasi tha se negociatat për armët po “përparonin në mënyrë aktive” midis dy vendeve.
“Nuk mund të mos jem thellësisht i shqetësuar për bashkëpunimin ushtarak dhe një marrëveshje armësh”, tha Kim Yung-ho.
Ministri i kërkoi Phenianit dhe Moskës të ndalojnë “aktet e paligjshme” që do t’i çonin të dy vendet në “izolim dhe regres më vete” .
Ai paralajmëroi se Koreja e Veriut do të përballet me një përgjigje më të fortë nga Koreja e Jugut, SHBA dhe Japonia nëse vijon të “kapet pas zhvillimit të saj bërthamor”.
