Alibeaj: Droga në Mal të Zi, dëshmi e bashkëpunimit të qeverisë me krimin

Ish-deputeti demokrat, Enkelejd Alibeaj, e ka cilësuar drogën e kapur në Mal të Zi, e cila kaloi nga territory shqiptar, si një provë të bashkëpunimit të qeverisë me krimin. Alibeaj shprehet se kalimi i një sasi të tillë droge, pa u kapur nga pikat kufitare shqiptare, dëshmon bashkëpunimin e qeverisë me krimin.

“2.6 ton lëndë narkotike janë kapur përtej kufirit shqiptar, në Mal të Zi. Kjo ngjarje risjell edhe një herë në kujtesën e shqiptarëve vitet e errëta 2014-2017 të qeverisë Rama kur vendi u shndërrua në plantacion gjigand droge e kur sasi të tilla masive përshkonin territorin shqiptar, vite kur policia shqiptare ishte bashkëpunëtore dhe mbështetja e këtij trafiku ishte deri në rangje qeveritare. Kjo ngjarje, e cila mbahet e fshehur nga qeveria, apo duke e kaluar me një njoftim të thatë, është provë e qartë, se qeveria e Ramës, vetëm “qimen e bardhë ka ndërruar, por zakonin nuk e ka harruar”, -tha Enkelejd Alibeaj në një deklaratë për mediat.