Balla: Baltën e Saliut e zgjidh reforma në drejtësi

Deputeti Taulant Balla tha se pretendimet e PD-së nuk qëndrojnë dhe duke iu përgjigjur deklaratave të Berishës, socialisti deklaroi se do jetë reforma në drejtësi ajo që do t’i japë fund historisë së baltosjes

“Ne duam të ngremë institucione të forta të hetimit dhe të gjykimit. Ky që sapo foli ka një qerre me probleme me drejtësinë dhe është gjithmonë njeriu që mundohet të bllokojë. Rrinte ulur vetë dhe u bënte thirrje deputetëve të tij që t’i binin bankave të Kuvendit”, ka thënë Balla duke iu referuar Berishës.

Nënkryetari i grupit parlamentar të PS është shprehur se, kur pala kërkuese ka legjitimitet në kërkesën e saj, ajo mund të kalojë për të shkuar në Gjykatën Kushtetuese pa qenë nevoja për t’u rënë bankave. “Por, ritheksoj se reforma në drejtësi është mënyra më e mirë për t’i dhënë fund gjithë kësaj”, ka thënë Balla.

Sa i përket deklaratave të Berishës për Byronë Kombëtare të Hetimit, Balla i ka cilësuar ato si “abuzive” dhe ka nënvizuar se çështja ka marrë përgjigje. Por, sipas tij, PD vepron me dy standarde.

“Ne ramë dakord dje me partinë e Lulit, sot me partinë e Saliut u prish akordi. Partia Demokratike nuk ka qenë ndonjëherë më keq se kaq”, ka shtuar Balla.