Bylykbashi: Timoni i makinës së Ramës pret bosh në kthesë, i ngjan një skode të vjetër

Të bësh fushatë në Durrës konsiderohet e vështirë, ndërkohë që demokratët pas 2005-ës, (kur morën të gjitha mandatet e deputetëve me sistem zgjedhor mazhoritar) kanë pësuar rënie nga viti në vit, veçanërisht në zgjedhjet vendore.

Kësaj here lista kryesohet nga Oerd Bylykbashi dhe ai pretendon fitore. Marrëveshja Rama-Basha, thotë ai i ka ulur tonet agresive të fushatës, ndonëse ende ka zyrtarë që nuk kanë kuptuar çfarë i pret me ndryshimet ligjore konsesuale dhe po përpiqen të blejnë apo intimidojnë qytetarët për votën e tyre.

“Kandidatë në lista të cilët po shfrytëzojnë në maksimum ofiqet që kanë patur apo që kanë, për të blerë votën me premtime legalizimesh, me premtime hipotekimesh, me lejimin e ndërtimeve pa leje, kur deri dje i fusnin në burg edhe për një tjegull, pra për të gjitha këto. Ndërkohë që hallexhinjtë që ata i tërhoqën zvarrë në katër vite, përfitojnë atë që në fakt është e drejta e tyre. Ata po përpiqen që të drejtën e tyre këto ditë ta shesin si një favor elektoral. Pra jo hallexhiu, por si kryetar prej disa muajsh në degën e Durrësit Bylykbashi tregon modelin që po ndërton në Durrës me delegimin e besimit dhe dhënien e pushtetit strukturave, si dhe fokusin e fushatës tek ekonomia. Ai thotë se demokratët kanë një program realist dhe janë të besueshëm për shkak edhe të eksperiencës rezultative në qeverisje. Rezervon dhe një batutë për timonin që kërkon kryeministri Rama për qeverisje.

 Zoti Bylykbashi si është të bësh fushatë në Durrës?

Oerd Bylykbashi: Fushata në Durrës është interesante, por është dhe shumë e vështirë. Është një qytet i cili është gjithmonë i heshtur. I sheh problematikat, por kurrë nuk është i zhurmshëm dhe për rrjedhojë duhet të punosh shumë fort, në mënyrë shumë të strukturuar për të arritur objektivat, rezultatet dhe shpeshherë të surprizon kur mendon që ke punuar shumë fort, mund të të japë rezulatate shumë më të mira seç e mendon, siç ndodhi në vitin 2005. Ne punojmë ndërkohë fort. Motorët e fushatës janë të ndezur të gjithë dhe shpresojmë që ky dyjavësh të jetë akoma më i nxehtë në aspektin e ritmit të fushatës.

Folët për 2005 dhe më kujtohet një fjali që kishit në hapjen e fushatës elektorale. Thatë se nëse fitohet në Durrës, fitohet në të gjithë Shqipërinë. Keni një perceptim real mbi këtë?

Oerd Bylykbashi: Në fakt kjo është diçka që nuk është imja. Ky lloj perceptimi është e përhapur goxha edhe në ambientin qytetar durrsak. Pra Durrësi është një lloj indikatori i fortë për rezultatin e përgjithshëm. Sigurisht ka ndryshime nga 2005-a, por edhe elektorati ka ndryshuar për shkak të ardhjeve të vazhdueshme të zgjedhësve nga zona të tjera. Edhe sot e kësaj dite pjesa e vjetër e qytetit të Durrësit konsiderohet bastioni i së djathtës. Një qytet që ka refuzuar Enver Hoxhën rregullisht. Por sigurisht që gjërat ndryshojnë, nuk janë të skalitura. Po punojmë që të materializojmë atë që është një energji shumë e fortë kundër qeverisë, pakënaqësi e madhe, por jo vetëm duke shfrytëzuar votën negative, por edhe duke i bindur për atë që po ofrojmë. Por mbetet fakt që problematikat janë shumë të rënda dhe Durrësi është një model për qeverisjen katërvjeçare të Partisë Socialiste dhe Lëvizjes Socialiste për Integrim, modeli më “i mirë” që përfaqëson maksimalisht arrogancën qeveritare.

Ju e keni theksuar disa herë këtë. A do mundet, nisur dhe nga situata që reflektohet edhe pas marrëveshjes së 18 majit Rama – Basha, a do mundet pra që ndikimi i drogës, i krimit, i korrupsionit, për të cilat ju keni folur gjatë gjithë kësaj periudhe, të shmanget, të mos ndikojë në vullnetin e lirë të zgjedhësve më 25 qershor?

Oerd Bylykbashi: Ne po bëjmë gjithë punën tonë që të identifikojmë votën ekzistuese, votën e re të djathtës, të bindim të tjerë që të ndryshojnë. Lista na jep mundësinë që të maksimalizojmë rezultatin tonë, duke përfshirë dhe botën e aleatëve që tani votojnë nën siglën e PD-së. Marrëveshja sigurisht ka dhënë efektet e saj për një lloj qetësimi të atij agresiviteti që pritej dhe për rrjedhojë qytetarët kanë gjithmonë e më shumë një ndjesi që ndoshta nuk ua kontrollojnë votën. Ne po punojnë pikërisht për këtë. Jam i sigurt që sa më shumë qytetarët perceptojnë se qeveria nuk ua kontrollon dot votën, aq më të lirë do të jenë edhe përkundër skemave kriminale, siç është blerja e votës nga zyrtarë të PS-së apo LSI-së, të cilët përtej asaj ç’mendojnë, jam i sigurt që do të përballen me burgun për atë që po bëjnë në këtë moment në Durrës. Kandidatë në lista të cilët po shfrytëzojnë në maksimum ofiqet që kanë patur apo që kanë, për të blerë votën me premtime legalizimesh, me premtime hipotekimesh, me lejimin e ndërtimeve pa leje, kur deri dje i fusnin në burg edhe për një tjegull, pra për të gjitha këto. Ndërkohë që hallexhinjtë që ata i tërhoqën zvarrë në katër vite, përfitojnë atë që në fakt është e drejta e tyre. Ata po përpiqen që të drejtën e tyre këto ditë ta shesin si një favor elektoral. Pra jo hallexhiu, por këta persona do të përballen me ligjin.

Keni bërë denoncime?

Oerd Bylykbashi: Po përgatisim të gjithë dokumentacionin. Janë disa persona që spikasin dhe besoj që edhe struktura ligjzbatuese që kontrollohet nga ministrat teknikë po jep efektin e saj. Ka ulur presionin mbi administratën, po ashtu grupet kriminale apo këta agjentët me jaka të bardha që janë drejtorë, përgjegjës apo shefa në administratën vendore apo qendrore, do ta marrin kusurin e tyre. Aktivitetet elektorale do të përshallëzohen më shumë, po aq besoj dhe goditja e këtyre fenomeneve.

Ju keni disa muaj që drejtoni degën e Durrësit si kryetar i komanduar i saj. Megjithatë koha gjatë drejtimit të kësaj dege u nda me organizimin e strukturave, me aktivizimin e tyre në protestën 90 ditore, me negociatat për detajimin teknik dhe ligjor të marrëveshjes së arritur mes kryeministrit Rama dhe kryetarit të opozitës Basha. A ju ka ndikuar kjo në aktivitetin tuaj në Durrës, në kuptimin e mbajtjes gjallë të strukturave të partisë?

Oerd Bylykbashi: Jam një individ i cili ka ato kapacitete, resurse që ka kushdo. Dhe 24 orët e kohës sime janë njësoj si 24 orët e kujtdo. Unë jam përpjekur të bëj më të mirën në këtë histori dhe duke e ditur gjithë këtë dhe duke e përjetuar qoftë edhe 90-ditëshin e protestës, organizimin e dy protestave të mëdha, përsa i përket degës së Durrësit, por mbi të gjitha ngritjen e strukturës në funksion të një rezultati zgjedhor fitues, e kam konceptuar nëpërmjet fuqizimit të strukturës me pushtet. Pra një lloj delegimi, decentralizim nga uni i kryetarit. Po përpiqem të sjell një model tjetër në drejtimin e degës së Durrësit, duke u dhënë më shumë fuqi strukturave poshtë. Durrësi është një qytet i madh. PD është një parti e madhe në Durrës. Është perceptuar gjithmonë si një parti e durrsakëve dhe qëllimi im ishte ta riktheja patjetër tek durrsakët. Nuk është detyrë e përmbushur për shkak të të gjitha rrethanave. Nuk është një detyrë që mbyllet qoftë dhe me datën 25 qershor. E imja në koncert me të gjithë kolegët tjerë është pikërisht kjo, por për ta përballuar këtë dhe për të performuar më tepër, objektivi im kryesor është delegimi tek shtabet, tek strukturat poshtë, të cilat në fakt bëjnë punën. Nuk i bëj unë votat që i duhen për mandatet Partisë Demokratike, nuk i bëjmë në mënyrë individuale në kandidatët për deputet. Është struktura ajo që punon dhe ajo që prodhon rezultat dhe asaj i jemi mirënjohës. Asaj duhet që nesër dhe t’i përgjigjemi, bashkë me qytetarët në të njëjtën kohë. Por është pjesa politikisht më aktivja e për rrjedhojë nuk mund të mos t’u japim atyre pushtet.

Duket sikur “dënimi” juaj është që të mos konsideroheni politikani politikan, por politikani teknicien. Kam parasysh që minimalisht katër vitet e fundit. Koha juaj e fundit është përqëndruar në negociata, në rolin e negociatorët për dekriminalizimin, për paketën kushtetuese të reformës në drejtës, për ligjet. Por me marrëveshjen e 18 majit paralajmërohet po një punë kaq intensive me reformën kushtetuese dhe reformën zgjedhore.

Oerd Bylykbashi: Po unë jam një politikan që vjen nga një bazë…me një bosht shumë të fort teknik, politikan edhe teknokrat, nuk jam i vetmi. Sigurisht që lëkura politike është trashur vazhdimisht në këtë aspekt. Janë tashmë dhjetë vite eksperiencë. Por unë do t’ua rekomandoj një pjesë të madhe të politikanëve që ta kenë një bosht, një fibër profesionalizmi brenda, sepse, siç kam rastisur ta them dhe herë tjetër, është ankora që na mban me integritet dhe soliditet në politikë… pa folur për çdo lloj gjëje me argumentin e parë që del përpara një mikrijoni apo kamere.

Për të ndaluar pikërisht tek reforma zgjedhore, por edhe praktika në terren. A keni situata gjatë fushatës të tilla gjatë fushatës, kur jeni para dilemës se si mund t’i implementoni ato në kodin zgjedhor?

Oerd Bylykbashi: Po është e vërtetë. Këtë e bëj gjithmonë. Është natyrale. Është diçka që vjen në mënyrën më të natyrshme të mundshme. Besoj se zgjedhjet janë më shumë se një proces teknik, janë një proces i pastër politik. Për një palë zgjedhje nuk të duhen 200-300 nene të Kodit Zgjedhor. Nuk të duhet super ekspertizë juridike. Duhet vullneti politik për të bërë një gjë shumë të thjeshtë: zgjedhësi që hyn në qendrën e votimit, merr fletën e tij të votimit, shkon pas një dhomë të fshehtë, voton në fshehtësi, e hedh fletën e votimit në kuti (atë të duhurën, jo të gabuarën), dhe largohet. Më pas është detyra e komisionerëve për t’i numëruar ato fletë votimi ashtu siç numërojnë çdo gjë tjetër me ndershmëri. Për këtë ju garantoj se më shumë se 20 nene nuk duhen e për rrjedhojë nuk duhet dhe hiperekspertizë.

Por kjo është dita e votimit dhe e nesërmja e votimit, po deri aty…

Oerd Bylykbashi: Nëse kjo është e qetë dhe e mirë edhe pjesa tjetër është tillë. Pra një proces shumë politik. Përtej asaj që është pjesa ime, formimi im, i cili më shtyn të mendoj zgjidhjen e situatave që shoh në terren, dhe kjo është një eksperiencë shumë e mirë në këtë aspekt, nga ana tjetër gjykoj që gjëja kryesore është të japim modelin e bërjes së zgjedhjeve të qeta, të mira, të ndershme. Duhet të vijë koha që zgjedhjet në Shqipëri, veç demokratike të kthehen ndoshta gati gati edhe rutinë. Në Shqipëri karakterizohen nga flamuj pa fund, përplasje, njerëz që zihen për postera, retorikë shumë e ashpër. Ka një qetësi në këtë aspekt këtë herë. Marrëveshja prodhoi rregulla të reja që besoj se janë të vlerësueshme në këtë aspekt dhe kjo po ndikon tek zgjedhësit, sepse janë më pak të trembur, më pak të frikësuar për kontrollin e votes. Këta zgjedhës sot po vijnë e po na thonë çdo ditë e më shumë, nëpërmjet asaj gjysmëfrazës më tepër, ku na urojnë shpeshherë dhe gati fshehurazi. Ajo tregon temperaturën që po rritet. Njerëzit kanë më shumë siguri. Zgjedhjet po u dukën diçka më normale. Po rikthehemi tek zgjedhjet e vitit 2009 dhe tek ato të vitit 2013; momente të rëndësishme politikë, kur zgjedhjet ishin shumë të pranueshme dhe jo diçka e frikshme, jo presion nga policia, jo presion nga administrata, jo presion nga kriminelët. Durrësi i mbledh të gjitha; është katalog i të gjitha fenomeneve negative të qeverisjes dhe të procesit zgjedhor. Por mesa duket ka njëlloj çlirimi, njerëzit nuk e mbajnë më brenda. Ne do punojmë fort që këto dy javë ta shtyjmë fort këtë drejt rezultatit në kutinë e votimit.

Nga këto ditë fushatë në fakt duket më tepër sikur më shumë po mendohet për koalicionin se sa për fituesin…

Oerd Bylykbashi: Në fakt në terren unë fokusin e kam vetëm tek fituesi dhe nuk po mendoj fare për koalicionin bashkë me kolegët e mi. Po përpiqemi të nxjerrim rezultat maksimal. Bëjmë pjesën në frontin tonë. Gjithësekush bën pjesën në frontin e vet. Pas datës 25 do të ulemi të mendojmë mbi bazën e rezultatit që doli, që është gjëja më tipike që ndodh. Por në këtë moment objektivi im ,duke kryesuar atë listë, por me gjithë kolegët e tjerë… Në listën e Durrësit është dhe nënkryetari i partisë zoti Paloka. Deputet me eksperiencë të madhe politike dhe teknokrate gjithashtu, në fund të fundit ashtu si e imja, zoti Florion Mima. Por edhe zoti Duka apo kolegë të tjerë, pjesë e listës… Jemi të gjithë duke bërë maksimumin për të arritur objektivin tonë në qarkun e Durrësit. Kështu që kemi dhe dy javë kohë. Nuk merremi me koalicionet, por vetëm me koordinimin maksimal të votave të koalicionit faktik të opozitës.

Dhe një herë, a e mendoni 2005-ën si rezultat dhe pse sistemi atëherë ishte ndryshe?

Oer Bylykbashi: Nuk po qëndrojmë të mendojmë se ç’mund të bëjnë zgjedhësit, po përpiqemi të mendojmë ç’do bëjmë ne, ç’ofrojmë ne. E kemi përqëndruar mesazhin tonë tek ekonomia, e cila në një shtrat normaliteti të politikës prodhon atë begatinë që nis që nga një tryezë e një familjeje të thjeshtë, të cilës nuk duhet t’i mungojnë gjërat bazë, në prosperitet të dikujt që bën një biznes, fiton dhe krijon vende pune. Ky është shtrati. Sigurisht që kanabizimi, kriminalizimi i politikës, kriminalizimi i jetës janë të gjithë faktorë negativë të cilët në katër vjet i luftuam fort, por ç’bëjnë? Godasin pikërisht ekonominë dhe shpresën. Pra, ne duam që përsëri të harrohet emigracioni, ashtu siç e harruam deri në vitin 2013. Nuk kishte më njerëz që emigronin siç po emigrojnë tani, me qindra mijëra nga Shqipëria dhe shpesh jo të varfër; njerëz me profesione dhe të ardhura që kanë humbur besimin apo kanë frikën e së ardhmes të fëmijëve të tyre. Pra ne po fokusohemi pikërisht tek kjo. Të shkosh në një treg industrial dhe të gjesh që në mesditë shumica dërrmuese e shitësve, të cilët i shërbejnë një shtresë të varfër të popullësisë, nuk kanë shitur asgjë, është një barometër, tregues shumë i fortë për situatën e varfërisë në të cilën gjendet popullata…dhe po flasim për Durrësin.

Por mosbesimi është ai që ka qenë problematik për PD dhe politikën në tërësi, të paktën gjatë vitit të fundit. Është theksuar gjithmonë që opozita, ok, ka program, por a krijon besim?

Oerd Bylykbashi: Krijon besim. 90 ditëshi besoj ishte diçka që askush nuk e dinte përpara dhe ne provuam rezultatin. Dy protesta në hapje dhe në mbyllje ishin ndër më të mëdhatë në historikun e demokracisë shqiptare. Një lëvizje që nuk ka një precedent në historikun 27 vjeçar të demokracisë. Një program që të gjithë e kuptojnë që është shumë i mirë, presim që të zbatohet. Por kështu ndodh: fiton zgjedhjet dhe pastaj e zbaton programin. Ne kemi dhënë prova që përkundër një vështirësie kaq të madhe po futemi në një hulli, ku Partia Demokratike mbi bazën e një eksperience të shkuar do të projektojë veten në të ardhmen. Do të marrim më të mirën e saj për t’u dhënë shqiptarëve atë që deri katër vite më parë ne ua ofronim. Investime, punë, stabilitet, nivel i ulët kriminaliteti. Në çdo rast lufta ndaj korrupsionit do të jetë flamur beteje yni.

A keni pasur kohë të ndiqni zotin Rama dhe Zotin Basha në fushatë? Zoti Rama kërkon timonin, të mos ketë askënd në prehër që të qeverisë. Zoti Basha thotë se do të jetë kryeministër i ekonomisë së shqiptarëve.

Oerd Bylykbashi: Një kryeministër mund të jetë vetëm duke ofruar një ekonomi solide. Një kryeministër me batuta zor ta konceptosh të tillë. Tani këtë merak që ka zoti Rama për punën e timonit… kjo makina që do t’i japë zoti Rama, me bashkëshofer apo jo nuk ka pikën e rëndësisë, i ngjan një skode të vjetër që i pret timoni bosh në kthesë. Kështu që nuk është alternativa për shqiptarët. / Intervistoi: Merita Haklaj – ABC News/