Gazment Bardhi replikon me Ramën: Shqipërisë i duhet pastrimi nga krimi

Sekretari i Përgjithshëm i PD, Gazment Bardhi ka reaguar pas deklaratave të Edi Ramës për nisjen e aksionit të pastrimit të mbeturinave që bashkitë që para 30 qershorit drejtoheshin nga opozita.

Bardhi shprehet se vendi ka nevojë të pastrohet nga krimi dhe korrupsioni që ka instaluar qeverisja “Rama”.

“Shqipëria ka nevojë jetike të pastrohet nga krimi dhe korrupsioni i Edi Ramës dhe bandës së tij në bashki dhe qeveri. Janë këta që nuk lënë biznesin dhe qytetarët të marrin frymë, që pengojnë turizmin, që po varfërojnë dhe po zbrasin vendin. E kundërta është propagandë kundër interesit publik. As informaliteti nuk po luftohet, përsa kohë nuk preken oligarkët e oborrit të familjes së Ramës, as jeta në qytete nuk do të bëhet më e mirë pse kryeministri sillet si pastrues gjatë ditëve të tij të pushimit. Që t’i shërbejmë Shqipërisë, ne duhet të pastrojmë zyrat e shtetit nga të korruptuarit dhe nga veglat e krimit. Nëse nuk e bëjmë këtë, do të jemi më të varfër, më keq, më të izoluar. Askush nuk do të na pranojë në Europë”,- shkruan Gazmend Bardhi.