Kejdi Mehmetaj: Vendi në krizë të thellë, Rama ka kapur drejtësinë

Ish-deputetja e LSI Kejdi Mehmetaj e ftuar në rubrikën “Opinion” në “News 24” tha se Shqipëria sot ndodhet në një krizë të thellë dhe se Edi Rama ka kapur drejtësinë.

“Rama tenton të kapë drejtësinë dhe këtë e dinë të gjithë. Nuk mund të ketë drejtësi të pavarur kur sistemi është kapur nga një njeri. Kjo është një situatë anormale. As shqiptarët nuk besojnë më te drejtësia.

Ajo ka shtuar se sot Shqipëria ka disa probleme të thekshme, por opozita po bën beteja më tepër për Teatrin dhe për Unazën, pasi këto janë raste skandaloze të qeverisjes aktuale.

“Ne reagojmë për çdo rast, ndërsa te Teatri ose Unaza ishin raste të pariparueshme, janë raste tepër të ndjeshme. Këto janë raste që ilustrojnë tiraninë e Ramës të përditshme. Qeveria ka dhunuar qytetarët. Opozita ka marrë vendime shumë të forta, duke reaguar fuqishëm për padrejtësi. Janë dhunuar madje figura të rëndësishme të kulturës, së kombit. Më shumë se 85 për qind e shqiptarëve e refuzuan Ramën”, deklaroi ajo.

Mehmetaj u shpreh se 30 qershori është nul dhe se vendimet duhet t’i marrë Gjykata Kushtetuese.

“Gjykata Kushtetuese do të duhet të vendosë nëse 30 qershori është i ligjshëm. Gjithë procesi është nul. Zgjedhjet reale janë më 13 tetor. Shpresoj që Gjykata Kushtetuese të mund të marrë një vendim të drejtë”, tha ajo.

Për Mehmetajn, vendimet e Ilir Metës janë të një burri shteti.

“Unë besoj se vendimet e presidentit Meta janë të një burri shteti. Z.Meta ka përdorur ngjarjen aktuale dhe shprehja që ai ka përdorur tregon një reagim. Presidenti i ka pasur të qarta qëndrimet e tij”,- tha Kejdi Mehmetaj.