Kritikat për videon, Rama: Ç’keni që lehni, njerëzit na besojnë

Kryeministri Edi Rama ka reaguar me një postim në “Twitter” pas kritikave për publikimin e imazhit të prindërve të së mitures së abuzuar në Kavajë.

Rama i quan lehje deklaratat nga opozita pas reagimit të tij të vetëm për ngjarjen në Kavajë ku nxori me zë e figurë prindërit e së miturës. “Po tani çfarë keni që lehni apo jua kemi fajin ne pse njerëzit besojnë tek ne e jo tek ju, hiena të politikës e të medias? Po mos të ishin vrasësit, përdhunuesit, grabitësit, krimet e fatkeqësitë, ju s’do ekzistonit, se s’keni hiç tjetër për t’u dhënë njerëzve veç helmit e vrerit”,- shkruan Edi Rama.

Ndërkohë Partia Demokratike nëpërmjet deputetes Albana Vokshi i ka kërkuar kryeministrit Rama të shkarkojë ministren Spiropali dhe të fshijë videon. LSI e quajti të paligjshme videon e prindërve dhe kërkoi reagimin e shoqërisë.

Videoja e prindërve të së miturës ishte jo pak e befasishme pasi vetë përfaqësues të maxhorancës kishin kërkuar që kjo çështje të mos politizohej dhe babai i vajzës apeloi që të mos flitej më për rastin e rëndë.

Lexoni edhe…

• Spiropali publikon videon me prindërit e të miturës në Kavajë
• PD: Rama ka 1 orë të shkarkojë Spiropalin e të heqë videon nga FB
• Erisa Xhixho: Sot “u përdhunuan“ prindërit e vajzës nga Kavaja
• Publikimi i pamjeve të prindërve, Gjosha: Rama shkeli ligjin dhe të drejtën e fëmijës
• Zhupa: Kjo qeveri s’ka turp! Kriminale!