Ndahet nga jeta kryetari i Bashkisë së Rrogozhinës

Është ndarë nga jeta kryetari i Bashkisë së Rrogozhinës, Haxhi Memolla. Infarkti i ka marrë jetën kryebashkiakut. Memolla mbante postin e kryebashkiakut të Rrogozhinës, prej 30 qershor të 2019, pasi u zgjedh në zgjedhjet lokale.

Mësohet se 52-vjeçari mesditën e sotme ka qenë në qytetin e Peshkopisë, ku kishte shkuar për të ndjekur ndeshjen Rrogozhinë-Peshkopi.

Pasi ka përfunduar pjesa e parë e ndeshjes Memolla së bashku me kryetarin e bashkisë së Peshkopisë, Dionis Ymeraj ata janë larguar për të pirë një kafe aty pranë, por Memolla ka ndjerë një dhimbje në kraharor.

Menjëherë ai është dërguar në spitalin e Peshkopisë por nuk ka mundur që të mbijetojë duke u shuar në moshën 52-vjeçare. Ai ka mbaruar arsimin e lartë për inxhinieri agrare.