Nishani takim me kreun e NATO: Shqipëria të rrisë investimet e mbrojtjes

Presidenti i Republikës Bujar Nishani është takuar sot me kreun e NATO-s Jens Stoltenberg, të cilët kanë biseduar për rritjen e sigurisë, siç është momentalisht sfida e terrorizmit.

Gjatë konferencës për shtyp, Stoltenberg u shpreh që Shqipëria duhet të rrisë investimet në fushën e mbrojtjes dhe e konsideroi Shqipërinë si një vend kyç që ka rol stabiliteti në rajonin e Ballkanit.

Kreu i NATO-s theksoi gjithashtu se një tjetër pikë e rëndësishme që diskutoi me Presidentin Nishani ishte edhe shkëmbimi i informacioneve mes shërbimeve të Inteligjencës.

Kurse, Presidenti Bujar Nishani theksoi se Shqipëria do të mbështesë çdo përpjekje dhe angazhim të aleancës së NATO në kuadër të çështjes së sigurisë. Njësoj si edhe Stoltenberg, Nishani u shpreh se Shqipëria duhet të rrisë më shumë investimet në fushën e mbrojtjes dhe të sigurisë.