Presidenti Meta nderon Vasillaq Zërin, tregon një sekret nga familja

Në një ceremoni homazhesh, familjarë, të afërm, miq e sportdashës, por edhe personalitete politike kanë nderuar për të fundit herë Vasillaq Zërin, ish-lojtarin e Dinamos dhe Kombëtares që u nda dje nga jeta në moshën 66-vjeçare pasi vuante nga një sëmundje e rëndë.

Përpara figurës së tij është përkulur sot edhe i pari i shtetit, Presidenti Ilir Meta, i cili e cilësoi humbjen e Zërit një humbje të madhe për sportin.

Duke u ktheyr në kohë, Presidenti tregoi edhe një histori nga familja, kur tha se bashkë me të atin, një tifoz jo normal i Dinamos, siç e përshkroi ai dhe bashkë me të e ndiqte në stadium Vasillaq Zërin. Ai e quajti magjistar triblimesh që vështirë se mund ta ndalje në fushë.

“Si djali i një tifozi jo shumë normal të Dinamos e kam ndjekur shumë Dinamon e atyre viteve, një nga ngjarjet më emocionuese ishte kur topi prekej nga Zëri, ai ishte magjistari i triblimeve. Ishte lojtari kyç jo vetëm i Dinamos por edhe i Kombëtares”,- tha Meta.