Rajmonda Bulku përgënjeshtron Ramën: Ndërto teatër të ri, jo duke shkulur të vjetrin!

Aktorja dhe ish-deputetja e PD, Rajmonda Bulku ka reaguar ndaj deklaratave të Edi Ramës që citonte një qëndrim të disa kohëve më parë të saj për prishjen e Teatrit Kombëtar.

Në një reagim në rrjetet sociale, Bulku shprehet se është për ndërtimin e një Teatri të ri, por jo duke shembur të vjetrin.

“Unë jam për një teatër të ri, dhe i qëndroj deklaratave të mia, por jo në dhunim të ligjeve, kolegëve, miqve e shokëve të mi! Respekto traditën! Ruaje historinë! Ndërto teatër të ri, jo duke shkulur të vjetrin! Jam larg dhe me vjen keq që mungoj të jem mes kolegesh në teatër …!!!! Në krahët e mi mbaj mbesën time që më mrekullon dhe dëshiroj që të bëhet aktore teatri….!!!”,- shkruan Rajmonda Bulku.

Paraditen e sotme, Edi Rama deklaroi se teatri do të prishet dhe solli se shembull një deklaratë të bërë nga Bulku disa kohë më parë.

https://www.instagram.com/p/B0VsTlpATqF/?utm_source=ig_web_copy_link

Postimi i Edi Ramës në Facebook:

Minoranca e zhurmshme dhe e verbër teatralo – politike, nuk përfaqëson asfare opinionin e shumicës së komunitetit të artistëve të skenës, për projektin e Teatrit Kombëtar!

Ja çfarë mendon një aktore e njohur e skenës kombëtare, e cila jo vetëm s’ka asnjë lidhje me këtë shumicë qeverisëse, po ka qenë aktive si qytetare qysh në kohën e ndryshimeve historike dhe më pas edhe si deputete, në radhët e Partisë Demokratike:

RAIMONDA BULKU

Aty duhet të ketë një teatër shumë të mirë, ç’më duhet mua se çfarë ndërtohet anës teatrit, apo mbi teatër. Në qiell le të ndërtohet, s’kam ndonjë gjë; unë dua të ndërtohet një teatër. Nuk ka rëndësi fare se çfarë. Godina e teatrit duhet shembur, pa dyshim. Ne po përjetojmë kushte mizerabël. Unë nuk e di se si punojmë aty, është turp të punosh aty. Tani që u gjet Turbina, shumë mirë, ajo sallë është për atë zonë, atë lagje dhe si ajo duhet të ndërtohet edhe një në Kombinat, edhe një në Laprakë, që padyshim është një lagje afër Tiranës. Unë do të dëshiroja që të ngrihet një Teatër i ri Kombëtar, me parametra të tjerë.