Shtetësia shqiptare, Presidenti Ilir Meta në shërbim të qytetarëve

Politikë E Premte, 17 Shtator 2021 17:55

Presidenti Ilir Meta e ka kthyer faqen e tij zyrtare në rrjetin social “Facebook” jo vetëm një dritare informative lidhur me aktivitetet e tij si Kryetar i Shtetit, por edhe në një mundësi për zgjidhjen e problematikave që hasin qytetarët lidhur me marrjen e shtetësisë shqiptare.

I tillë është rasti i një qytetari, i cili teksa rrëfen origjinën e tij të prindërve, shprehet se jeton në Kosovë, ndërsa thekson se i është refuzuar kërkesa për dhënien e shtetësisë shqiptare.

Duke iu referuar këtij shqetësimi, Presidenti Meta në komunikimin e tij me qytetarin thekson se është interesuar personalisht për rastin në fjalë dhe nga verifikimi i kryer rezulton se në Institucionin e Presidentit të Republikës nuk ka asnjë praktikë të administruar me emrin “Naim Peposhi”.

“Përshëndetje z. Peposhi! U informova nga administrata për rastin tuaj dhe nga verifikimi i kryer rezulton se në Institucionin e Presidentit të Republikës nuk ka asnjë praktikë të administruar me emrin Naim Peposhi. Ndoshta këto kërkesa janë depozituar në Ministrinë e Brendshme, por për sqarime të mëtejshme në lidhje me proçedurat e marrjes/fitimit të shtetësisë shqiptare dhe trajtimit sipas ligjit, ju mund të kontaktoni në këto numra +35542389801; +35542389853 me zyrën përkatëse që trajton çështjet e shtetësive.

Gjithashtu kur të jeni në Tiranë nëpërmjet numrave të mësipërm, ju mirëpres për një takim miqësor në zyrën time. Me respekt, Ilir Meta”- shprehet në përgjigjen e tij, Presidenti Meta.

Lista e Dokumentave për të fituar shtetësinë shqiptare

Procedura për fitim të shtetësisë shqiptare bazohet në ligjin Nr.8389, datë 05.08.1998 “Për Shtetësinë Shqiptare”, i ndryshuar.

Po ju radhisim dokumentet që duhet të paraqiten:

1. Kërkesa e shtetasit të huaj drejtuar Presidentit të Republikës

2. Çertifikata e lindjes (origjinale me vulë Apostile ose legalizim në përfaqësitë diplomatike të Republikës së Shqipërisë në vendin ku është lëshuar dokumenti

3. Çertifikatë martese (origjinale me vulë Apostile ose legalizim në përfaqësitë diplomatike të Republikës së Shqipërisë në vendin ku është lëshuar dokumenti;

4. Lejeqëndrimi në Republikën e Shqipërisë (Leje-qëndrimi 5 vjeçare, për të gjithë shtetasit e huaj, Leje-qëndrimi 3 vjeçare, për ata të huaj që vertetojnë origjinën shqiptare deri në dy shkallë, qoftë edhe nga njëri prind, (me certifikatë ku të pasqyrohet shtetësia shqiptare e të paralindurit), Leje-qëndrimi 1 vjeçare, për ata të huaj të martuar me shtetas shqiptar, por jo më pak se tre vjet martese).

5. Akti i pronësisë së banesës ose kontrata e qirasë së të banesës në Republikën e Shqipërisë (fotokopje e noteruar).

6. Kontratë pune për të punësuarit ose vërtetim nga Zyra e Tatimeve për të vetëpunësuarit (fotokopje e noterizuar).

7. Dokumenta që vërtetojnë disponimin e mjeteve financiare të mjaftueshme për jetesë (si garanci bankare, librezë kursimi, vërtetime zyrtare të ardhurash në Republikën e Shqipërisë).

8. Dëshmi penaliteti e marrë në vendin e origjinës (origjinale me vulë Apostile ose legalizim në përfaqësitë diplomatike të Republikës së Shqipërisë në vendin ku është lëshuar dokumenti

9. Vërtetim i Gjendjes Gjyqësore në Republikën e Shqipërisë;

10. Fotografi (copë 3)