Socialisti Musa Ulqini: Ligjin e mediave e ndryshuam mbrëmë vonë

Deputeti i PS, Musa Ulqini, i ftuar në Report Tv, tha se dje në mbrëmje në komisionet parlamentare kanë bërë ndryshime në draft që reflektojnë shqetësimet e gazetarëve por edhe të organizatave ndërkombëtare. Sipas tij, asnjë portal nuk do të mbyllet pa një vendim gjykate.
“Ne ja garantojmë qytetarit, edhe portalit, të drejtën që e fundit për të gjitha cështjet të jetë gjykata. as Këshilli i Ankesave, as AMA, por gjykata. Ne e kemi garantuar këtë të drejtë. Zonja në fjalë nuk e ka lexuar cfarë kemi bërë ne mbrëmë, sepse akoma nuk ka dalë drafti i rregulluar. Ky shqetësim është reflektuar në mënyrë të qartë. Unë flas me përgjegjshmëri se jam relator i çështjes. Shqetësimi i parë ishte që gjykata nuk është e pranishme dhe vendimet e bordit të AMA-s dhe Këshillit të Ankesave nuk shkonin në gjykatë. Ky shqetësim është forcuar dhe reflektuar në projekt”, tha Ulqini, duke pasur një reagim edhe për deklaratën e komisioneres së Këshillit të Evropës për të Drejtat e Njeriut që sot i bëri thirrje parlamentit të tërheqë draftin dhe të bëjë ndryshimet pasi në versionin e tanishëm cënon lirinë e të shprehurit.
“Ne nuk mund të kishim drafte të ndryshëm. Të gjithë faktorët i kemi ftuar në diskutimet tona në parlament. Të gjithë kanë rënë dakord që violinë e parë të jetë OSBE”, tha Ulqini.
Ai shtoi se “në projekt ka qenë e përcaktuar vetëm për tre çështje, që po lexohen, që të bllokojnë internetin, nga 3 milionë çështje. Ne nuk jemi Koreja e Veriut, as Kina, as Venezuela…heqjen e përmbajtjes jo më vonë se 60 minuta, kur dyshohet se nxit, pornografi, terrorizëm dhe sigurinë kombëtare. I heq shkrimin dhe nuk mbyllet portali”, u shpreh Musa Ulqini.
Portalet do të duhet të regjistrohen me detyrim tek AKEP-i, dhe jo më me dëshirë siç muajt e fundit ishte bërë një thirrje nga ky institucion. Tek AKEP merr një licencë tha Ulqini, duke sqaruar se “ligji i detyron të gjithë të regjistrohen dhe se nuk ka lidhje me rrjetet sociale, por vetëm me portalet.
Sipas tij, një herë në vit, drejtuesit e portaleve, duhet të dorëzojnë një raport se nga i kanë marrë paratë, dhe si i kanë shpenzuar. Sa i përket vendosjes së gjobave ndaj portaleve në rast të shkeljeve, Musa Ulqini tha se vlera maksimale është ulur nga 10 milionë lekë të vjetra që ishte në draftin e pandryshuar, në 4 milionë lekë të vjetra, maksimumi. “Shqetësimi për gjobat e larta është i drejtë. Komisioni me propozim të Ikonomit dhe timin, në respekt të parimit të proporcionalitetin për portalet, nuk mund të gjykohet një portal me 5 veta si një televizion kombëtar. Kur flitet për gjobat propozuam që gjobat për portalet të mos jenë të njëjta si për radiot dhe televizionet, nga 10 milionë të vjetra, u zbrit në 4 milionë të vjetra, nis nga 100 mijë deri në 4 milionë lekë maksimumi. Ligji nuk bëhet për të bllokuar, por për të rregulluar. Reklamat që thithin portalet me televizionet, radiot nuk është i njëjtë. Sipas pronarëve të portaleve nuk duhet të ketë fare gjoba, por ne nuk bëjmë një ligj në favor t ënjë grupi, por në favor të së drejtës”, tha Ulqini.