Takimi i aleatëve të PD, Shehi zbardh vendimet: Sulmi i opozitës do të jetë 360 gradë

Këtë të hënë kreu i PD-së, Lulzim Basha takoi aleatët. Në një prononcim për mediat nga selia blu pas takimit, kreu i LZHK-së, Dashamir Shehi tha se sulmi i opozitës do të jetë 360 gradë.

”Protesta e radhës do të jetë para Parlamentit të enjten. Kërkesa mbeten po ato, largimin e Ramës, qeveri tranzitore që të ndërmarrë përsipër punë të rëndësishme. Pastaj po qenë të zotë le të fitojnë prap. Këta janë diskredituar në rrafshin ndërkombëtar”, u shpreh Shehi.

I pyetur më tej për skepticizmin e ndërkombëtarëve, Shehi u shpreh se me Ramën në krye ka vetëm destabilitet, krim e drogë dhe se janë ”në rrugën për të bindur dhe ndërkombëtarët për këtë punë”.

I pyetur nëse Rama nuk tërhiqet dhe a ka ndonjë skenar nga opozita, ai nënvizoi se: ”Nuk kemi diskutuar për këtë punë por do të diskutohen pas datës 16. Sulmi i opozitës do të jetë 360 gradë. Do ta përcaktojmë pas demostratës tjetër të madhe që do të organizohet. Jemi me shpresë qe njerëz të logjikshëm do të reflektojnë”.