Reforma në Drejtësi u miratua në vitin 2016 me 140 vota, por ligji për statusin e gjyqtarëve dhe prokurorëve do të kalojë sërish në votë në parlament.
Këtë herë motiv i ndërhyrjes është opinioni i qytetarëve në procesin e këshillimit kombëtar, të cilët ishin pyetur nga Kryeministri nëse duheshin pezulluar nga detyra gjyqtarët dhe prokurorët që nuk kanë kaluar ende Vetting-un, por që kishin marrë vendime haptazi në kundërshtim me ligjin.
E pikërisht për këtë kategori, Ministria e Drejtësisë propozon pezullim të menjëhershëm sapo Inspektori i Lartë i Drejtësisë, institucioni ku punojnë apo dhe vetë ministria paraqesin ankesë.
