Anglia po zhvillon një fushatë kualifikuese të përsosur. Me 21 pikë në 7 ndeshje, 20 gola të shënuar dhe asnjë të pësuar, skuadra e Thomas Tuchel vazhdon marshimin dominues drejt Kupës së Botës.
Fitorja 2-0 ndaj Serbisë jo vetëm i afron “Tre Luanët” edhe më shumë Botërorit, por gjithashtu i çon pranë një arritjeje historike: nëse ruajnë portën të paprekur edhe kundër Shqipërisë, Anglia do të bëhet ekipi i parë europian që kualifikohet pa pësuar asnjë gol.
Edhe pse riktheheshin lojtarë të rëndësishëm si Jude Bellingham dhe Phil Foden, Tuchel vendosi të mos prekte shumë formacionin. Vendimi u shpërblye shpejt: në minutën e 28-të, Bukayo Saka zhbllokoi rezultatin me një goditje fluturimthi, duke vendosur në vështirësi Serbinë. Pavarësisht përpjekjeve të Vlahovic dhe shokëve të tij, serbët nuk gjetën qartësi në finalizim.
Pas ndeshjes, trajneri Tuchel vlerësoi karakterin e skuadrës: “Një ndeshje e vështirë ndaj një rivali me lojtarë të nivelit të lartë. Ata hynë në këtë sfidë me energji të reja, për ta ishte një finale. Patëm momente të komplikuara, por kjo është normale. Nuk mund të fitosh çdo ndeshje me rezultat të thellë. Ajo që ka rëndësi është porta e paprekur – po ndërtojmë një ekip të fortë.”