Agjenti i Ronaldos: I lumtur për transferimin, Cristiano mbyll karrierën me Juven!

Arkitekti i transferimit të shekullit është ai, quhet Jorge Mendes dhe ka atributet e babait të Cristiano Ronaldos, edhe pse nuk e lidh asgjë biologjikisht me futbollistin portugez. Agjenti i fituesit të “Topit të Artë” u shpreh i kënaqur për mënyrën sesi shkuan tratativat, që çuan lojtarin e përfaqësuar prej tij te Juventusi.

“Jam shumë i lumtur për Cristianon dhe besoj se Juventusi do jetë klubi i tij i fundit. I lumtur që Ronaldo mori këtë vendim, pasi me këtë skuadër do të mbyllë karrierën e mrekullueshme. Falënderoj në mënyrë të veçantë presidentin Andrea Agnelli për vendosmërinë në tratativat me Realin e Madridit”, tha agjenti i lojtarit luzitan.

Prokuratori i atij që është fitues i “Topit të Artë” dhe kandidat për ta rifituar, do të marrë rreth 25 milionë euro, si kosto ndërmjetësimi, ndërsa Cristiano Ronaldo do të paguhet rreth 30 milionë euro në sezon.