Allegri vendos nën presion Napolin: Sfidë jo vendimtare, por më e rëndësishme për ta

Napoli-Juventus është super sfida e kësaj jave në Seria A, që do të luhet të premten në mbrëmje. Trajneri i bardhezinjve, Massimiliano Allegri ka vendosur në presion rivalët duke u shprehur se për ta do të jetë një sfidë më e rëndësishme.

“Ata janë favoritët sipas renditjes. Nuk është një ndeshje vendimtare, por shumë e rëndësishme për ta. Ne përballemi me një ekip të organizuar dhe të stërvitur mirë.

Spalletti është një trajner i shkëlqyer, këtë e ka treguar edhe në përvojat e kaluara. Ndeshjet në “Diego Armando Maradona” nuk mbarojnë kurrë dhe duhet të jemi gjithmonë të përqendruar gjatë 90 minutave.

Dëmtimet? Rikuperimi i lojtarëve të dëmtuar është drejt përfundimit. Mendoj se kundër Atalantës disa mund të jenë të disponueshëm. Cuadrado të martën do të kthehet në grup dhe ndoshta do të jetë kundër Monzës.

Chiesa do të jetë gati për nesër dhe jam shumë i lumtur për këtë. Të gjithë djemtë po bëjnë mirë, në veçanti Danilo. Qëndrimi ka ndryshuar dhe kjo është falë ekipit. Kemi pasur rezultate pozitive, por duhet të vazhdojmë të punojmë më shumë për t’u rritur dhe më shumë”, tha Allegri.