Analiza e “Gazzeta Dello Sport”: Shqipëria e Panuccit larg nga ajo e De Biasit!

Në prag të nisjes së eliminatoreve të Europianit të vitit 2020, prestigjiozja italiane “Gazzetta Dello Sport” ka analizuar 10 grupet kualifikuese që do të përcaktojnë 20 skuadrat e kualifikuara në Europian ndërsa 4 të tjera do të zbulohen nga faza “play off” e Ligës së Kombeve.

Në skanimin që i bën grupit H ku bën pjesë edhe Shqipëria, gazeta italiane shkruan se kuqezinjtë e drejtuar nga Christian Panucci do ta kenë shumë të vështirë të përsëritin suksesin që arriti Gianni De Biasi në eliminatoret e Euro 2016-të.

“Kampionët e Botës të Francës nuk duhet të kenë rreziqe. Edhe pse u mundën nga Holanda në Ligën e Kombeve, ata nuk duhet të frikësohen nga Islanda, që zhgënjeu në Kupën e Botës dhe u rrëzua në Ligën B në Ligën e Kombeve, dhe nuk ka fituar asnjë ndeshje që nga tetori 2017-të. Apo nga Turqia e Calhanoglu, që u rrëzua në Ligën C të Ligës së Kombeve, dhe ende mbështetet tek një 38-vjeçar si Emre dhe 33-vjeçar si Burak Yilmaz.

Më pas, për vendin e dytë, luan edhe Shqipëria e Christian Panuccit, i cili do ta ketë të vështirë të përsërisë shpërthimin e De Biasit, por ka disa nga elementët më ekspertë në ekip, si napoletani Hysaj, Taulant Xhaka, apo Memushaj nga Pescara. Grupi mbyllet nga Moldavia dhe Andorra”, shkruhet në artikullin e postuar nga “Gazzetta Dello Sport”.