Armando Sadiku dhe Alban Hoxha, e nisën aty ku “balta, më e ëmbël se mjalta”! (Foto)

Dy lojtarë të kombëtares sonë, Armando Sadiku dhe Alban Hoxha, e kanë nisur karrierën nga fusha e Cërrikut, që këtë fundjavë dhuroi “pamje spektakolare”. Lojtarët e Turbinës së këtij sezoni festuan  në mes të baltës golin ndaj Egnatias së Rrogozhinës. Sulmuesi Armando Sadiku para se të largohej në Zvicër ku luan aktualisht me Zurih, provoi të ishte pjesë e kësaj skuadre, si një talent i nënvlerësuar nga ekipi i tij ku u formua si futbollist, Elbasani. Por portieri i Partizanit, Alban Hoxha, është formuar tek kjo skuadër para se të bashkohej më të kuqtë dhe më pas kombëtares sonë. Hoxha theu rekordin këtë sezon si portieri që e mbajti portën më shumë minuta pa prekur dhe u shpall futbollisti më i mirë i vitit 2014 në Shqipëri. Siç edhe tregon shfaqja e fundit në Cërrik, një talent nuk mund të gjykohet se pse vjen nga balta apo edhe rruga, ndaj edhe pavarësisht fushës së Turbinës, nga ky qytet Shqipëria pret të evidentohet talenti i radhës.