Barcelona ka marrë një vendim të rëndësishëm për menaxhimin e dëmtimit të Lamine Yamal, i cili prej disa javësh po vuan nga pubalgia dhe ka luajtur me dhimbje. Klubi katalanas ka zgjedhur të shmangë operacionin në këtë fazë dhe ta dërgojë sulmuesin 18-vjeçar drejt një trajtimi të specializuar në Finlandë.
Pavarësisht spekulimeve të shumta mbi gjendjen fizike dhe mendore, Yamal ka reaguar duke i mohuar ato: “Është thënë shumë për pubalgjinë dhe trishtimin tim, por ishin të gjitha gënjeshtra.”
Për të gjetur një zgjidhje efektive pa ndërhyrje kirurgjikale, Barça i ka besuar doktor Lasse Lempainen, një nga specialistët më të njohur në botë për trajtimin e pubalgjisë. Lempainen ka bashkëpunuar edhe më parë me klubin, duke trajtuar me sukses Araújo dhe Balde.
Talenti i ri do t’i nënshtrohet një programi të personalizuar rehabilitimi, me qëllim uljen e dhimbjes dhe parandalimin e agravimit të gjendjes. Ndërhyrja kirurgjikale do të merret në konsideratë vetëm nëse situata nuk përmirësohet.
Barcelona mbetet e vendosur të mbrojë potencialin e Yamal, duke mos rrezikuar asgjë në rikuperimin e tij, me shpresën që ai të rikthehet së shpejti në formën e tij më të mirë.