FOTO / Luajti ndeshjen e fundit, Kaçe i jep lamtumirën Panathinaikosit dhe kthehet te PAOK

Mesfushori i përfaqësueses shqiptare të futbollit, Ergys Kaçe, i ka dhënë lamtumirën përfundimisht ekipit të Panathinaikosit, duke mbyllur huazimin te kjo skuadër me mbylljen e sezonit në Greqi. Lojtari u huazua te skuadra e qytetit të Athinës nga PAOK, por për shkak të situatës financiare në klub, Panathinaikos e ka të pamundur që të blejë kartonin e tij.

Pas ndeshjes së djeshme, ku skuadra e tij u mund 2-1 nga Ksanthi, Kaçe u ka dërguar një mesazh falënderimi të gjithëve te Panathinaikos nëpërmjet rrjeteve sociale.

“Sot ishte ndeshja ime e fundit. Faleminderit Panathinaikos. Faleminderit trajner, faleminderit skuadrës, faleminderit ju tifozëve dhe të gjithë të tjerëve që më mbështetët nga dita e parë e deri në fund. Ju uroj më të mirën për të ardhmen”, ishin fjalët e futbollistit shqiptar.

Tani, ai do të kthehet te PAOK, i cili zotëron kartonin e tij, por me shumë mundësi gjatë verës do të transferohet në radhët e një skuadre tjetër, në formë huazimi apo transferim përfundimtar./vipsport