Ish-mjeku i Bajernit shpërthen ndaj Guardiolës: Ka probleme me vetëbesimin!

Pep Guardiola është një njeri me “vetëbesim të dobët”, sipas mjekut të Bajern Mynih, i cili ka sulmuar ashpër trajnerin aktual të Sitit në autobiografinë e tij të re.

Ata të dy u “përleshën” shpesh gjatë qëndrimit të Guardiolës në “Allianz Arena”, me ish-trajnerin e Barcelonës të irrituar nga refuzimi i Muller-Vohlfahrt për të ndjekur seancat e trajnimit të bavarezëve.

Përplasjet arritën kulmin pas humbjes 3-1 të Bajern Mynih në Porto, në çerekfinale të Ligës së Kampionëve, në vitin 2015, pasi Muller-Vohlfahrt dhe tre anëtarët e stafit të tij u larguan dhe pohuan se ata ishin përgjegjës për humbjen.

“Mendoj se Pep Guardiola është një person me një vetëbesim të dobët, që bën gjithçka për ta fshehur këtë nga njerëzit e tjerë. Për shkak të kësaj, ai duket se jeton në një frikë të vazhdueshme, jo aq shumë nga humbjet, por nga humbja e pushtetit dhe autoritetit. Ai e dinte çdo gjë më mirë se të tjerët: Pesë minuta për ngrohje duhej të ishte e mjaftueshme, por kjo nuk mund të përfundonte mirë. Me sa duket, më pa si një marrës i komandave, që ai mund të urdhëronte sa herë që dëshiron”, ka thënë Muller-Vohlfahrt në një ekstrakt të botuar sot nga “Bild”.