Teuta ka sulmin e tretë më të mirë të Superiores, por garon për mbijetesë

Teuta është një nga “paradokset” më të mëdha në këtë sezon, pasi djemtë e detit po rrezikojnë mbijetesën ndërkohë që janë skuadra me sulmin e 3-të më të mirë të kampionatit. Ardhja e Gentjan Begejës në stolin e Teutës ka sjellë një ndryshim rrënjësor pasi është përforcuar shumë mbrojtja që për hir të së vërtetës është reparti i dytë më i dobët pas Lushnjës.

Një skuadër që ka shënuar 34 gola, vetëm Skënderbeu dhe Kukësi kanë shënuar më shumë, Teuta nuk mban në gjirin e saj një sulmues goleador të kampionatit, pasi Latif Amadou me 4 gola është shumë larg garës për Këpucën e Artë.

Goleadori i skuadrës është mesfushori Anel Dedic me 8 realizime, ndërkohë që goli është një çështje grupi pasi janë plot 16 lojtarë që kanë shënuar me fanellën e Teutës, duke përfshirë edhe futbollistët e larguar gjatë merkatos së janarit, Nijaz Lena, Albi Dosti dhe Ardit Shehaj. Teuta nuk ka në përbërje një qendërsulmues të mirëfilltë, por gjen në vazhdimësi rrugën e rrjetës në kampionat. Duket e pabesueshme, por sulmi i tretë më i mirë i kampionatit lufton për të mbijetuar.

Ekipi                Gola të shënuar

Skënderbeu     58

Kukësi             51

Luftëtari          34

Teuta Durrës   34

Partizani          33

Laçi                 33

Flamurtari        29

Kamza             29

Vllaznia           29

Lushnja           20