Kukësi shkarkon Armando Cungun, zbulon trajnerin e ri

Drejtuesit e klubit të futbollit të Kukësit kanë marrë vendimin për të shkarkuar nga detyra trajnerin Armando Cungu. Vendimi është njoftuar nga vetë klubi, ku thuhet se shkarkimi ka ardhur si pasojë e rezultateve negative në javët e fundit. Deri në fund të sezonit skuadra do të drejtohet nga Ramazan Ndreu, aktualisht drejtor i menaxhimit të klubit.

“Futboll Klub Kukësi njofton përfundimin e bashkëpunimit me trajnerin Armando Cungu. Si pasojë e rezultateve negative te javëve të fundit, drejtuesit e Klubit dhe Armando Cungu kanë arritur me mirëkuptim përfundimin e bashkëpunimit. Falenderojmë trajnerin Cungu për kontributin e dhënë në drejtimin e skuadrës sonë dhe i urojmë suksese në karrierë! Që nga dita e sotme në krye të pankinës sonë do të jetë Ramazan Ndreu, i cili mbante detyrën e drejtorit të menaxhimit te klubi ynë”, thuhet në reagimin e Kukësit.

Kukësi ndodhet në vendin e dytë në kampionat me 44 pikë, 9 pikë më pak se Partizani i vendit të parë. Në pesë ndeshjet e fundit, skuadra ka fituar dy herë dhe ka pësuar tre humbje.