Kukësi transferon në formë huazimi futbollistin e Juventusit

Klubet shqiptare gjatë sezoneve të fundit kanë nisur bashkëpunimin e mirë me skuadrat italiane. Së fundmi është Kukësi që ka arritur të mbyllë transferimin e një futbollisti të Juventusit, në formë huazimi. Bëhet fjalë për Omar Toure, i cili është pjesë e Juventus U-23 dhe luan në qendër të mesfushës. Palët kanë arritur akordin që djaloshi i lindur më 18 shtatorin e vitit 1998 të vihet nën dispozicionin e teknikut Armando Cungu.

Më parë Toure ka luajtur për ekipet e moshave të Inter-it në Itali, më pas një viti u bë pjesë e bardhezinjve. Për shkak se nuk ka gjetur hapësira aktivizimi në Serie C me Juventus U-23, është gjetur akordi që Toure të huazohej diku.

Te kuksianët po bëhen gati edhe për të larguar lojtarë. Emrat e tyre tashmë janë bërë të ditur në media, ku i pari është Sabino Plaku. Sulmuesi ka kontratë afatshkurtër me verilindorët dhe nuk dihet nëse do të aktivizohet në Superiore me ta. Kamza është skuadra kandidate për të marrë shërbimet e tij. Edhe vet lojtari e ka pranuar se mund të transferohet atje ku luajti dhe një vit më parë.