Laçi përmbyset për 8 minuta në Qipro, por mban gjallë shpresat për kualifikim (VIDEO)

Laçi ju afrua shumë mrekullisë në ndeshjen e Ligës së Europës përballë Anorthosis. Ndonëse ka vuajtur në mbrojtje për pjesën më të madhe të takimit, ekipi kurbinas iu afrua shumë një rezultati surprizë, pasi 8 minuta shpërqendrim i kushtuan përmbysjen nga 1-0 për të, në 2-1 për vendasit.

Skuadra e drejtuar nga Besnik Prenga kaloi e para në avantazh, me anë të Hoxhallarit në minutën e 21-të, duke e mbyllur pjesën e parë në avantazhin minimal 0-1. Gjithsesi qipriotët reaguan mjaft mirë në 45-minutëshin e dytë, duke shënuar dy gola të shpejtë dhe duke përmbysur rezultatin me Pranjiç dhe Cise.

Por ajo që vlen të përmendet, është fakti se Laçi është skuadra shqiptare që pas ndeshjeve të para, ka më shumë shanse për të siguruar kualifikimin, pasi javën e ardhshme do të përballet në Shqipëri me qipriotët.