Luftëtari i shuan ëndrrën Europë Partizanit, barazim spektakolare në Gjirokastër (VIDEO)

Partizani nuk ka mundur që të shkojë më shumë se një barazim 2-2 në Gjirokastër, duke i dhënë thuajse lamtumirë objektivit për të arritur në zonën europiane. Ndeshja ishte me dy “fytyra”.

Partizani ishte dominues në 45 minutat e para. Skuadra e Klevis Dalipit kaloi në avantazh që në minutën e 25-të me Jasir Asanin. Mesfushori me tipare sulmues ndërmori një aksion personal, u shmang mjaft bukur dhe shënoi me të majtën. Sulmet e miqve nuk u ndalën dhe arritën të shënojnë golin e dytë me anë të Gojkoviçit. Krosim në zonë nga një goditje dënimi. Kroson Trashi në minutën e 30-të, Batha godet fillimisht me kokë duke e dërguar topin në shtyllën e dytë dhe aty Gojkovic gjuan me kokë duke e dërguar në rrjetë për 0-2.

Fraksioni i dytë ishte e kundërta e së parës, pasi dominues ishin djemtë e Hasan Likës. Abazaj shkurtoi diferencat në minutën e 52-të, me një goditje në një pozicion të prirët që u ndihmua nga devijimi i Belicës dhe një gabim në vendosje i portierit Hoxha. Në minutën e 71-të, vendasit organizojnë një tjetër aksion spektakolare që finalizohet në zonë nga Rapo.