Luiza Gega nuk merr pjesë në Europian për shkak të shkeljes së rregullores

Atletika shqiptare nuk mundi dot të bëjë prezantimin e saj në Kampionatin Europian të sallave të mbyllura në Glasgoë. As Izmir Smajlaj e as Luiza Gega nuk mundën të garonin. Nëse atleti i kërcimit së gjatë pati probleme fizike që e tërhoqën nga aktiviteti, Luiza Gega u penalizua nga ndryshimet e rregullores për të cilat ajo dhe trajneri i saj u informuan shumë vonë.

Atletja shqiptare që ishte kualifikuar në 2 gara 1500 dhe 3000 m nuk u lejua të merrte pjesë në këtë disiplinë të dytë. Kjo për faktin se ajo nuk kishte njoftuar në kohë mospjesëmarrjen e saj në 1500 m. Sipas rregullores së re, Gega dhe stafi i saj duhet të kishin bërë të ditur vendimin e tyre një ditë para garës ose ajo mund të kishte hyrë në garën e 1500 m dhe ta linte atë përgjysmë, dicka të cilën ajo nuk e mësoi në kohën e duhur.

Disiplina e 1500 dhe 3000 m ishin parashikuar të zhvilloheshin brenda 1 dite madje diferenca kohore ishte 1 orë dhe për këtë arsye Gega dhe trajneri Taulant Stërmasi vendosën që ajo të garonte në 3000 m.