Mema: Do të ketë afrime, hodhëm një hap drejt kualifikimit

Trajneri i Tiranës, Ardian Mema është shprehur i kënaqur pas fitores së bardhebluve 2-0 në ndeshjen e parë në Kupën e Shqipërisë. Sipas strategut të njohur ekipi i tij ka hedhur një hap të rëndësishëm drejt kalimit për në çerekfinale.

“Vlen shumë në aspektin psikologjik, e nisëm vitin mbarë. Loja më kënaq, edhe pse kemi sërish gabime. Janë minimizuar disi gabimet e shkuara. Për fillimin e këtij viti jam i kënaqur”.

Kualifikimi? Kemi bërë një hap të sigurt drejt kualifikimit. Vlora është ekip i fortë. Patëm disi edhe fat me golat, por mund të shënonim edhe të tjerë e ta mbyllnim kualifikimin.

Ngo? E kam sqaruar edhe më parë. Jam trajneri dhe luan kush është në formë. Edhe në ndeshjen e kaluar ka pasur ndryshime, Erando ishte jashtë. Një trajner sheh gjendjen dhe vendos se kush luan.

Pres afrime. E kam thënë, ekipi ka nevojë për lojtarë. Kanë ikur dy lojtarë dhe ata duhen zëvendësuar. Stolin e kisha me të rinj sot. Muçi ka edhe një vit me të rinjtë, por u fut me goxha kualitet në fushë. Gjithçka shkoi mirë. Në ditët në vazhdim do të ketë të reja”, deklaroi Mema pas ndeshjes.