Mourinho zbulon arsyen e largimit të Martialit

Trajneri portugez, Jose Mourinho, ka treguar se Anthony Martial e ka lënë turneun e parasezonit të Manchester Unitedit për të qenë i pranishëm në lindjen e fëmijës së tij të dytë në Paris.

Emri i 22-vjeçarit francez është përfolur për një largim të mundshëm nga klubi anglez gjatë kësaj vere. Agjenti i tij ka deklaruar se Martiali dëshiron të largohet nga klubi për shkak të marrëdhënieve jo të mira me trajnerin e klubit, Jose Mourinhon.

“E mora vesh se Martiali po largohej për në Paris kur më tregoi ai. Ishte para dy apo tri ditëve. Kur është për arsye personale, të gjithë e analizojnë në mënyrën që mendojnë se është korrekte”, ka thënë ai.

“Kur një burrë bëhet baba, në këtë rast është hera e dytë që ai do të jetë baba, dhe ai vendos se është e rëndësishme që ai të jetë aty, atëherë askush nuk ka të drejtë ta ndalojë”.