Presidenti i La Ligas zbulon arsyen e largimit të Ronaldos nga Reali

Presidenti i La Ligas në Spanjë, Javier Tebas ka zbuluar arsyen e vërtetë të transferimit të Cristiano Ronaldo nga Real Madrid, te Juventus në Seria A, të Italisë.

“Ronaldo u largua në Itali për arsye fiskale, për shkak të rregullave të reja, ai do të arkëtojë më shumë të ardhura sesa në Spanjë. Real Madrid e kishte shumë të vështirë të konkurronte me këtë fenomen, dhe ndonëse do të ketë patur edhe arsye të tjera, ky ishte një motiv madhor”, deklaroi Tebas.

Pasi u prezantua si lojtar i Juventusit dhe takoi trajnerin e shokët e rinj të skuadrës, Cristiano Ronaldo la Torinon për të udhëtuar në Kinë, në një event të “Nike”. Ylli portugez më pas do të vijojë sërish pushimet, për të filluar përgatitjet vetëm më 30 korrik me bardhezinjtë.

Ronaldo nuk do të udhëtojë me Juventusin në Shtetet e Bashkuara, për të marrë pjesë në një turne veror, ndaj dhe debutimi i tij me bardhezinjtë duket se do të vijë vetëm në javën e parë të kampionatit.